डलर खेतीइ व्यस्त सभासद्त

येँ (झीगु स्वनिगः)

संविधानसभा बैठक न्ह्यानाः च्वंबलय् मिसा सभासद्त एनजीओया ज्याझ्वलय् व्यस्त जुल धकाः छगू इलय् तसकं हुइना भुइना नं जूगु खः । थुकिं यानाः संविधानसभाया नायःया नापं ध्यान आकषिर्त जूगु खः ।
तर मिसा सभासद् जक मखु, थीथी समूह दयेकाः सभासद् एनजीओया ज्याझ्वः व धेबाय् न्ह्यइपूकाः च्वंगु दु । संविधान निर्माणया झ्वलय् थीथी विषयलय् संगठित रुपय् थःपिनिगु बिचाः व माग तयेत दबाब समूहया रुपय् ककस नापं नीस्वंगु दु । सभासद्पिनिगु वर्ग व समूह कथं मिसा ककस, मुस्लिम ककस, आदिवासी जनजाति ककस, दलित ककस नीस्वंगु खः । तर संविधानसभा सचिवालयय् मिसा ककस जक दर्ता जूगु दु । मेमेगु समूहं थःयत्थे ककस नीस्वनाः थीथी गतिबिधि यानाः वयाच्वंगु दु । पिनेपाखें स्वात्त स्वयेबलय् थज्याःगु ककसय् आबद्ध सभासद्पिं एनजीओ लिसे आइएनजीओया ज्याझ्वलय् व्यस्त जुयाः डलर खेतीइ न्ह्यइपूकाः वयाच्वंगु दु ।

तर उमिसं थ्व खँयात धाःसा स्वीकार यानाच्वंगु मदु । आदिवासी ककसया दुजः एमाले सभासद् टासी ग्याल्मो गुरुङ्गसेनीं धयादिल - 'थीथी संस्थापाखें वइगु रकम गोष्ठी, सेमिनार लगायत चेतनामूलक ज्याझ्वलय् खर्च जुयाच्वंगु दु ।' न्हापां नीस्वंगु मिसा ककस शुरुइ हे दर्ता जुल । तर लिपा नीस्वंगु ककस दर्ता मजुल । विदेशी संस्थापाखें ग्वाहालि कायेत संस्था दर्ता यायेमाःगु व्यवस्था दु । उकिं छु नं छुं ककस धाःसा मेगु हे संस्था क्यनाः ग्वाहालि क्यनाः वयाच्वंगु दु । थुकिइ मध्येया छगू आदिवासी जनजाति ककस । उमिसं ताप्केगोला सेवा समाजया नामय् दुगु रकम कयाः खर्च यानाच्वंगु दु ।
मेमेगु ककसया ज्याकुथि मदुसां नं आदिवासी जनजातिया धाःसा अनामनगरय् तःधंगु ज्याकुथिइ दु । मेमेगु ककस स्वयाः वयागु गतिबिधि व चहःपहः नं आपालं थनं खनेदु । थुलिमछि तामझाम लिसे ज्याझ्वः यायेत ककस संविधानसभा सचिवालय धाःसा छाय् दर्ता मजुल ? सभासद् पासाङ शेर्पां धयादिल - 'सचिवालयं दर्ता यायेत मजूनी ।' अज्याःगु ला संविधानसभा सचिवालयसं दर्ता जुइहे माःगु नियम नं मदु । उकिसनं सचिवलायया कर्मचारीं धयादिल । 'सचिवालयया मुख्य दायित्व मेगु हे दु, संस्था दर्ता यायेगु मखु ।'