लेबनानतय् नेपाःमि मिसापिं ज्यामितय्गु नितिं प्रदर्शन
येँ (झीगु स्वनिगः)
अन्तर्राष्ट्रिय श्रमिक दिवसया लसताय् लागा आइतवाः लेबनानय् वनाच्वंपिं नेपाःमितय्सं अन प्रदर्शन यात । नेपाःमि मिसा ज्यामिपिनिगु सुरक्षा व अधिकारया पक्षय् नेपाःमितय्सं अथे प्रदर्शन याःगु खः । गैरआवासीय नेपाली संघ, लेबनानया अगुवाईया प्रदर्शनय् नेपाःमि नापं मेमेगु देय्या नागरिकतय्सं नं सहभागीता क्यंगु खः । प्रदर्शन मूल रुपं छेँज्या याइपि मिसा ज्यामितय्गु पक्षय् सः थ्वयेकेगु ज्या याःगु खः । अन आः म्होति नं च्याद्वःम्ह नेपाःमि मिसापिं हाउसमेडया रुपय् ज्या यानाच्वंगु दु । मिजंपिं नेपाःमि ज्यामित धाःसा जम्मा यानाः न्यासःम्ह जक दु । गैर आबासीय नेपाली संघ लेबनानया संस्थापक नायः दिपेन्द्र उपे्रतिं धयादिल 'अप्वःयाना मिसापिं ज्यामितय्गु समस्या दु ।
थन छेँथुवाः व एजेन्सीपाखें शोषण यानाच्वंगु विरुद्ध फुक्क नेपाःमित छप्पँ जुयाः प्रदर्शन यायेगु ज्या जूगु दु । थुकिया नितिं अन्तर्राष्ट्रिय अधिकारवादी संस्थात नाप जानाः ज्या जुयाच्वंगु दु ।' वय्कलं थन छेँ थुवाःतपाखें शारिरिक नापं मानसिक शोषण याःगुलिं वालय् छम्ह मिसां आत्महत्या यानाच्वंगु दु । लेबनानय् थ्वसिबें न्ह्यः खुल्ला रुपं प्रर्दशन यायेमदु धकाः प्रहरीं पनातःगु खः । थुगुसी धाःसा नेपाःमितय्सं थःपिनिगु आवाज थ्वयेकेगु नितिं सशक्त कथं सतकय् प्रदर्शन याःगु दु । विश्व श्रमिक मजदुर दिवसया लसताय् लाकाः अथे सतकय् नेपाःमि मिसापिनिगु नितिं याःगु थ्व हे न्हापांगु प्रदर्शन खः ।
