बजेट अधिवेशनया विरोध छाय् ?

सरकारं बजेट सम्बन्धी छलफल यायेत म्हिगःनिसें सःतूगु संसद अधिवेशनयात कयाः नेपाली कांग्रेस लगायत झिंछगू दलतय्सं विरोध यायेगु वा संसद अवरोध यायेगु धाःगु दु । प्रतिपक्ष नेपाली कांग्रेस व मधेशवादी मोर्चाया पूर्वाग्रही व मूर्खतापूर्ण निर्णय खः । बजेटयात मस्वसे, मब्वंसे ई हे मत्यःनि वा जेठ १४ लिपा जक बजेट हयेमाः धकाः मात्रै विरोधया नितिं जक विरोध यायेगु प्रवृत्ति गलत खः ।
देशयात अनिर्णयया बन्दियानाः शत्रुतय्त न्हीकेगु ज्या यानावःपिं थुमिसं आखीर चाहे जुयाच्वंगु छु धयागु खँ स्पष्ट मदु । वर्तमान सरकारं संविधान जेठ १४ गते पिकाये धाःसां पिकायेके मबीगु, अले बजेटयात छलफल यायेधाःसा संविधान पिहांमवःतले पिकायेके मबीगु धायेगु देशयात हानं अनिर्णया बन्दी यानाः सरकार सञ्चालन व वइगु प्रक्रियायात हे थप्प यानाः अमूर्तया अवस्था हयेगु कुतः जक मखुला ?
नेपाली कांग्रेस व मधेशी मोर्चाया थुगु पंगलं बजेट ला पिहांमवइगु जुइ नापनापं इलय् संविधान ला छु संविधानया मस्यौदातक्क नं पिकाये फैमखु । शान्ति प्रक्रिया पूमवंकं संविधान पिकायेके मखु धयाः थुमिसं संविधान पिमथनेगु ज्या यानाच्वंसा आः संविधान पिमकाःतले बजेट पिकायेके बीमखु धकाः थुगु अधिवेशनयात असफल यायेगु कुतः याःगु दु ।

थःथःगु बुद्धि विवेकं ज्यायाये मफुपिं कांग्रेस व मधेशी मोर्चात भारतीय विदेशमन्त्री व न्हू दिल्लीया निर्देशनकथं जक ज्या यायेगु खःसा, नेपाली जनताया भोटया मू पुलेगु गबले थुमिसं ? नेपाली जनताया समस्याया समाधान यायेगुपाखे लगय् जुइगु गबले थुपिं ? शान्ति प्रक्रिया पूमवंतले संविधान दयेके बी मखु धाइम्ह कांग्रेसं बजेट अधिवेशनयात संविधान पिमकायेगु षड्यन्त्रया नां बीयाः नेपाःमि जनतायात न्हिइकेगु ज्या यानाच्वंगु दु । थौं संविधानसभाया न्ह्यःने यक्को हाथ्यात वयाच्वंगु दु । संक्रमणकाल ताःहाकः जुयाः विशेषा परिस्थितिइ लानाच्वंगु देशयात न्ह्यःनेयंकेगु पलेसा पंगःया पंगः थनाः थप समस्याय् थुनेत स्वयाच्वंगु दु ।

देश व जनताया आवश्यकतायात कयाः गबले मुंज्या मच्वनीगु कांग्रेस व मधेशी मोर्चातय्सं बजेट अधिवेशनयात छु गुकथं पंगः थनेगु धकाः इमि मुंज्या च्वनाच्वंगु दु । कांग्रेसया हाहालय् ब्वांवनाच्वंगु ११ गू दलतय्गु वर्तमान भूमिका यात कयाः जनतां न्यनेत स्वलधाःसा थुमिगु लिसः छु जुइगु खः धायेफैगु स्थिति मदु । बजेट अधिवेशनया न्हापांगु न्हि राष्ट्रपतिया पौ ब्वनाः न्यंकेगु ज्या जक जुइ । विरोध याइपिंसं छु गुगुकथं याइ व धाःसा स्वयेत पीहेमानिगु खनेदु ।

More Stories Like this