अमेरिकां १० दँलिपा लादेनयात स्यात

येँ (झीगु स्वनिगः)

अमेरिकां आतंकारी संगठन धकाः घोषणा यानातःगु अलकायदाया प्रमुख ओसामा विन लादेनयात अन्ततः झिदँ तक लगातार मालाः गोलीं कयेका स्यानाब्यूगु दु । म्हिगः सोमवाः सुथय् अथे अमेरिकी सेनां पाकिस्तानया इस्लामावाद लागाया अब्बोत्ताबादय् स्यायेत सफल जुल धकाः अमेरिकाया राष्ट्रपति बराक ओवामां सार्वजनिक यानादीगु खः । आक्रमणय् लानाः ओबामा नाप नापं मेपिं स्वम्ह नं सीगु खः धकाः धाःगु दुसा अथे सीपिं स्वम्ह मध्ये छम्ह लादेनया काय् नं लाःगु दु धकाः तकं दावी याःगु दु । सन् २००१ सेप्टेम्बर ११ या दिनय् अमेरिकाय् याःगु आक्रमणलिपा लादेनयात अमेरिकां मालेगु यानाच्वंगु खः । लादेनयात छ्यनय् गोलीं कयेका स्यानाब्यूगु खः । लादेनया अत्येष्टि यायेगु ज्या तकं क्वचाये धुंकूगु दु धकाः अमेरिकाया अधिकारीतय्सं धाःगु दु ।

लादेन दुगु इलय् अल काय्दाया निम्हम्ह व्यक्तित्व जुयाच्वंम्ह अय्मन अल—जवाहीरी प्रमुख जुइगु संभावना अप्वया वःगु दु । जवाहीरि अफगानिस्तान व पाकिस्तानया पहाडी सीमा लागाय् सुलाच्वंगु अनुमान यानातःगु दु । न्हापा मुस्मांतय्गु इजिप्त इस्लामिक जिहाद पुचःया संस्थापक जुयाः ज्या यानाः लिपाः अलकाय्दालिसे एकता याःगु खः । वय्कः अलकायदाया सैद्धान्तिक नेताया रुपय् नालातःम्ह खः । अमेकिारय् सन् २००१ सं आक्रमण याःगु इलय् नं वय्कः योजनाकार खः धकाः धाःगु दु ।