थौं मांया ख्वाः स्वयेगु दिं

येँ (झीगु स्वनिगः)

थौं मांया ख्वाः स्वयेगु दिं । थःत जन्म ब्यूम्ह मांयात साक्क भिंक नकेगु नाप नापं मां मदये धुंकूपिन्सं मांया नामय् निसलाः बिइगु व मातातिर्थय् वनाः म्वःल्हुइगु तकं याइ । मांया ख्वाः स्वयेगु दिनय् विशेष यानाः इहिपाः जुइ धुंकूपिं म्ह्याय् मस्तय्सं थःछेँय् मांया ख्वाः स्वःवयेगु याइ । दच्छिया दुने छन्हु जक जूसां 'मां दिवस' या रुपय् मांयात लुमंकेगु संस्कृतियात थौंया अत्याधुनिक इलय् नं उलि हे महत्व दयाच्वंगु कथं नालाः वयाच्वंगु दु । विशेष यानाः मांया ख्वाः स्वयेगु दिं धैगु नेवाः समाजय् थःगु हे कथंया महत्व दु । नेवाःतय्सं मांया ख्वाः स्वयेगु दिंयात संस्कृतिया रुपय् हनाः वयाच्वंगु दु ।