खँचु : विद्यार्थी मस्तय्त नापलाके वीगु वारे

प्यम्ह सांसदतपाखें संसदय् नाराबाजी

येँ (झीगु स्वनिगः)

व्यवस्थापिका संसदया म्हिगः सोमवाः बजेट अधिवेशन हो—हल्लाया दथुइ न्ह्याःगु दु । राष्ट्रपति डा रामवरण यादवपाखें बजेट अधिवेशनया नितिं छ्वयाहःगु पौ ब्वनाः न्यंकूगु इलय् सभासद्तय्सं हो—हल्ला याःगु खः । नारावाजीया दथुइ हे सभामुख सुवासचन्द्र नेम्वाङं राष्ट्रपतिया पौ ब्वनाः न्यंकादीगु खः । अथे हो—हल्लाया दथुइ बजेट अधिवेशन शुरु जूगु खःसां सभामुख नेम्वाङं संसदया मेगु मुँज्या वइगु बैशाख २५ गते सनिलय् स्वता इलय् जुइ धकाः मुँज्या स्थगित यानादीगु खः । दलतय्गु दथुइ बैशाख २७ गते नीति तथा कार्यक्रम व जेष्ठ ९ गते बजेट महयेगु धकाः सहमति जूगुलिं मेगु मुँज्या लिबाक्क सःतुगु खः ।

म्हिगः सोमवाःया संसदया मुँज्याय् प्यम्ह सांसद्तय्सं नारावाजी यानादीगु खः । आदिवासी जनजाति, दलित, मुस्मां नापं ल्यूने लानाच्वंगु समुदायपाखें प्रतिनिधित्व यानादीपिं सांसदत नेपाः राष्ट्रिय पार्टीया सांसद बुद्ध साय्मि, दलित जनजाति पार्टीया सांसद विश्वेन्द्र पासवान, संघीय लोकतान्त्रिक राष्ट्रिय मञ्चया रुक्मिणि चौधरी व स्वतन्त्र सांसद् सरदुल मियाँ हकं नारावाजी यानादीगुलिं अथे संसद्या मुँज्याय् पंगः ब्वलंगु खः ।
संसदया हिउदे अधिवेशनय् नं सांसद्तय्सं नारावाजी यानाच्वंगु हे इलय् अधिवेशनया अन्त्य जुल धकाः राष्ट्रपतिया पौ ब्वनाः न्यंकाः सभामुख नेम्वाङं घोषणा यानादीगु खः ।

संविधानया म्याद थप यायेगु कुतः
वइगु जेष्ठ १४ गते तक संविधानसभाया म्याद दुगु अले संघीय गणतान्त्रिक नेपाःया न्हूगु संविधान क्वछिनातःगु इलय् जारी याये मफैगु अवस्था ब्वलंगुलिं आः हाकनं संविधानसभाया म्याद थप यायेगु नितिं एकीकृत माओवाद व एमालेया नेतातय्सं थीथी दलया नेतातलिसे सहलह न्ह्याकूगु दु । थ्व हे दथुइ म्हिगः सोमवाः माओवादी व एमालेया शीर्ष नेतातय्गु दथुइ सहलह याःगु दुसा आः मेमेगु दलतलिसे नं सहलह ब्याकाः वनेगु धकाः खँ जूगु दु । विशेषयानाः नेपाली कांग्रेस, मधेसवादी दल नापं थीथी दलतलिसे अथे संविधानसभाया म्याद थप यायेगु विषयसं सहलह ब्याकी धाःगु दु । संविधानसभाया म्याद थप यायेगु नाप नापं जेष्ठ १४ गते संविधानया मस्यौदा जनतायाथाय् यंकेगु विषययात कयाः नं माओवादी व एमालेया नेतातय् दथुइ सहलह जूगु खँ सीदुगु दु ।
मेमेगु दलतलिसे नं संघीय गणतान्त्रिक नेपाःया न्हूगु संविधानया मस्यौदायात कयाः सहलह ब्याकी धकाः धाःगु दु । संविधानया मस्यौदा तयार यायेगु सवालय् राज्य पुनर्संरचना, शासकीय स्वरुप व निर्वाचन प्रणालीया सवालय् समाधान याये फयाच्वंगु मदुनि ।

बजेट १४ गते लिपा
प्रमुख प्रतिपक्ष नेपाली कांग्रेस व मेमेगु दलतय्सं जेष्ठ १४ गतेया दुने बजेट हयेके मबिइगु नापं हल धाःसा संसदय् पंगः थनेगु धकाः ख्याच्वः ब्यूगुलिं आः १४ गते लिपा जक बजेट वइगु अवस्था ब्वलंगु दु । विशेषयाः प्रधानमन्त्री झलनाथ खनालं प्रमुख प्रतिपक्षया समर्थन मदयेकं बजेट यंकेगु बांलाइ मखु धकाः धयादीगुलिं आः बजेट जेष्ठ १४ गते लिपा जक वइगु अवस्था ब्वलंगु दु धकाः नेतातय्सं जानकारी बियादीगु दु । थ्व हे दथुइ जेष्ठ १४ गते न्ह्यः बजेटया छुं नं कथंया प्रक्रिया मन्ह्याकेगु धकाः मूमू दलया नेतातय्गु दथुइ सहमति जूगु दु धकाः नं धाःगु दु ।