पंजः [गजल]

महाकवि गिरिजाप्रसाद जोशी

बन्धन फ्वना च्वना जिं अय् योम्ह छंगु ल्हाःया
च्वने यः जि पंजलय् हे गुलि यइपु छंगु माया

स्वांयात बास बंधन जुल धाःगु छं न्यना ला ?
मनयात आश बंधन जुल धाःगु छं न्यना ला ?
ज्यानयात सास बंधन जुल धाःगु छं न्यना ला ?
च्वने यः बंधनय् हे गुलि यइपु छंगु माया

ख्वाःयात रुप पंजः जुल धाःगु छं न्यना ला ?
मिखायात दीप पंजः जुल धाःगु छं न्यना ला ?
ल्हाःयात सीप पंजः जुल धाःगु छं न्यना ला ?
च्वने यः जि पंजलय् हे गुलि यइपु छ‌ंगु माया

छपु तीरयात युद्बं पन धाःगु छं न्यना ला ?
छम्ह वीरयात युद्बं पन धाःगु छं न्यना ला ?
छम्ह ज्ञानीयात बुद्बं पन धाःगु छं न्यना ला ?
च्वने यः जि पंजलय् हे गुलि न्ह्यइपु छंगु माया

More Stories Like this