आक्रमणय् बिन लादेन सित
अमेरिकी राष्ट्रपतिपाखें लादेन सीगु पुष्टि
येँ (सन्ध्या टाइम्स)/अमेरिकाया 'मोष्ट वान्टेड' धलःया १ नम्बरय् नां लानाच्वंम्ह अन्तर्राष्ट्रिय आतंकवादी नेता बिन लादेन थौं वंगु चान्हय् जूगु छगू सैन्य कारवाहीलय् लानाः सीगु दु। पाकिस्तान-अफगानिस्तान सीमा लागाय् भूमिगत रुपं च्वनाच्वंम्ह लादेनयात अमेरिकाया नेतृत्वय् वंगु सेनाया छगू पुचलं हवाई व स्थल आक्रमण यानाः स्याना बिउगु खः। अमेरिकी सेनां गोली लानाः क्षतिविक्षत जुयाच्वनेधुंकूगु लादेनया लाश नं लुइकेधुंकूगु दु। लादेन सीगु समाचार अमेरिकी राष्ट्रपति बाराक ओबामां अमेरिकी ई कथं बहनी हे छगू प्रत्यक्ष संवोधन मार्फत सार्वजनिक यानादीगु खः। लादेन सीगु जानकारी बिसें वय्कलं धयादिल, 'लिबाक हे जूसां न्याय जूगु दु ।'
सीआईएया नेतृत्वय् जूगु अमेरिकी व पाकिस्तानी सेनाया मंकाः खोजी पुचलं लादेनयात स्याःगु खः ।
अमेरिकाय् लसता:
बिन लादेन सीगु समाचार सार्वजनिक जुइवं अमेरिकाय् मनूत लय्ताःगु दु। खास यानाः न्युयोर्कया ट्वीन टावर ध्वस्त जूगु थासय् चान्हय् हे मनू वयाः लसता प्वंकूगु दु ।
विश्वन्यंकंया अमेरिकीतय्त खतरा:
लादेनया मृत्यु लिपा आः विश्वन्यंकं हे अमेरिकीतय्त आक्रमण जुइफु धासें अमेरिकी विदेश विभागं संसारया फुक्कं अमेरिकीतय्त अप्वः पिने मजुइत व पुचः मुनाः मच्वने इनाप याःगु दु ।
शेयरया भाः थहां वन:
बिन लादेन सीगु समाचार वयेवं शेयर बजाः सुधार जूगु दु। अष्ट्रेलियाया एशियन स्टक, अमेरिकाया युएस स्टकय् भाः थहां वंगु दुसा चिकं व लुँयागु भाः कुहां वःगु दु ।
पाकिस्तानया कपाः स्यात
राजधानी इस्लामावादं निघौ जक तापाःगु थासय् बिन लादेन च्वनाच्वनं नं पाकिस्तानं उकिया जानकारी अमेरिकायात मबिउ धकाः अमेरिका व पाकिस्तानया स्वापू स्यनेफुगु खँ दु। अमेरिकां लादेन पाकिस्तानय् दु धायेगु याना वयाच्वंगु खः ।
