मजदूर दिवस व नेपाःया मजदूरत

म्हिगः मे १ तारिख कुन्हु विश्वन्यंकं मजदूर दिवस तःजिक हन। नेपालय् नं थीथी थासं थीथी पार्टी प्रति आवद्ध मजदूरतय्सं र्‍याली यानाः दिवस हनेगु ज्या यात। थ्व दिवस वास्तवय् मजदूरतय्सं थःपिनि एकता व शक्ति प्रदर्शन यायेगु न्हि खः। संसारया आपालं देसय् मजदूरतय्सं हे क्रान्ति यानाः सत्ता पल्टे याःगु तकं उदाहरण दुगुलिं विश्वन्यंकंया मजदूरतय्सं उकी गर्व नं यानाच्वंगु दु ।

तर नेपाःया सन्दर्भय् धाःसा वंगु छुं ई न्ह्यवंनिसें मजदूरया किपा बांमलाःगु फ्रेमय् फिट यानातःगु अनुभव जुयाच्वंगु दु। खास यानाः मजदूरतय्सं लगातार याइगु औद्योगिक हडताल, बन्द आदि थेंज्याःगु कारणं यानाः देय्या उद्योग व्यवसाय हे प्रभावित जुयाच्वंगु दु। अझ गुलिखे इलय् मजदूरतय्सं मालिकयात ल्हाः वायेगु ज्या समेत याःगुलिं मजदूरपाखें मालिकं थः सुरक्षित दु धकाः तक नं महसुस याये मफुगु अवस्था जुयाच्वंगु दु। थ्व बिचाः हे यायेमाःगु विषय खः ।

मजदूरतय् हक हित सुरक्षित जुइमाःगु खँय् शंका मदु। तर थौंया ई देशय् सुयां हे हकहित जुयाच्वंगु मदु। उद्योग व्यवसायीत अथें नं ज्या यायेफुगु अवस्थाय् मदु। थज्याःगु इलय् मजदूरपाखें हे समस्या वइबलय् उद्योग बन्द यायेगु बाहेक मेगु विकल्प दइ मखु। थनथाय् राजनीतिक पार्टीतय् अन्यौलता नं स्वये लायक जुइ। उमित मजदूरपाखें हडताल माःगु दुसा मालिकपाखें चन्दा। उकिं उमिसं निगुलिं पक्षयात छुं धाये मफु। दलतय्सं छुं हे ज्या याये मफुगु कारणं यानाः न थौं मजदूरतय् धाथें हित जुइ फयाच्वन, न उपिं ज्या याइगु औद्योगिक प्रतिष्ठानत हे सुरक्षित जुइ फयाच्वन ।

More Stories Like this