शान्ति व संविधानया जपमाः

धर्मरत्न शाक्य


वि.सं. २०६८ साल न्हूदँया लसताय् सकल ब्वँमि भाजु-मय्जुपिंत सुख, शान्ति, समृद्धि, सु-स्वास्थ्य व ताःआयुया कामना यासें भिंतुना ।

नेपाः देय्या राजनीतिक घटनाक्रमया घःचाः गुल्ल तुतुं वि.सं. २०६७ सालया नं क्वचाल। थुकथं हे संघात्मक राज्य व्यवस्थाया न्हूगु संविधानया जपमाः हीकु-हीकुं दछि तना बिउगु ई नं पुला वनीन। थ्व च्वसु च्वयाः जेष्ठ १४ गते लिक्क थ्यनीबलय् न्हूगु संविधान पिहां मवइगु लक्षण खने दयेसाथ थाय्थासय् हडताल, बन्द आदिं थाय् काइगु सम्भावना नं यक्व हे दु। थुगु इलय् याउँक भत्ता नयाः ग्वाय् पियाच्वंपिं सांसदत गन खिउँगु गल्लिइ सू वने मालीगु खः, व ला सुना नं धायेफुगु खँ मखुनि। खतुं नेपाः सतीं सराः बियातःगु देय् धाइ। नेपाःया ऐतिहासिक पृष्ठभूमि स्वयेगु खःसा दुनुगलंनिसें तन, मन व धन देछायाः देश हितया निंतिं थःत पानावंपिं कर्मनिष्ठ राजनीतिक सेनानी व इमान्दार कर्मचारीतय्सं नं वि.सं.२००७, २०१७, २०३६, २०४६ सालया जनक्रान्तिया इलय् अपमान फयेमाल। खतुं शेरे नेपाल भाजु गणेशमान सिंह, कृष्णप्रसाद भट्टराई थेंज्याःपिं प्रमुख नेतातय्सं हे मिखां ख्वबि हायेका वने माल धाःसा साधारण सेवकतय्गु ला छु खँ? अथे हे झलनाथ खनाल व प्रचण्ड निम्हेसिया दथुइ गोप्य सम्झौता यानाः थुगु मन्त्रिपरिषदं अरबौं तकाया नक्कली भ्याट बिल पेश यानाः भ्रष्टाचार याःपिंत छूट बीगु त्वहचिना पूरक बजेट हइन। थुकथं हे सलंसः चम्चा, भ्रष्ट कर्मचारीतय्त इमिसं ल्यंगु यक्व यक्व छ्यापं वइगु आर्थिक ज्याकुथी सरुवा नं यात। नामधारी प्रगतिशील बाम सरकारया अनैतिक कर्तुतयात कयाः इमान्दार, कर्मनिष्ठ अर्थ सचिव रामेश्वर खनालं राजीनामा तकं बीमाल। उकिं थन छु जुइ अले छु मजुइ धइगु निश्चित रुपं धाये थाकु छाय्धाःसा हरेक राजनीतिक नेतातय्गु म्हुतुइ निपु म्येँ दु धइगु खँ ला सकसिनं सीकेधुंकूगु दु। छपु बाह्य व मेगु गोप्य ।

राजनीतिक पार्टीतय् दथुइ जुयाच्वंगु विवाद मिले जूगु खःसा तना बिउगु दछिया ई दुने संघात्मक राज्यया न्हूगु संविधान निर्माण जुयाः थ्व ०६८ सालया पूर्वार्ध इलय् लय्ताः प्वंकेगु ई नं हने दइगु खः। थ्व इलय् नेतातय्सं पदलोभी मजुसे संविधान निर्माणया मूल मुद्दाय् इमान्दारीपूर्वक पलाः न्ह्याकूगु जूसा झीगु देय् विश्वय् हे छगू दसि जुइगु खः ।

थौं म्हिगःया राज्यया मू आज्जु धइगु हे न्हूगु संविधान दयेकेगु व शान्ति सुरक्षा खः। शान्ति सुरक्षाया ला छु खँ ल्हायेगु, थौंकन्हय् न्हियान्हिथं भयावह जुइकाः म्वानाच्वने माःगु अवस्था जुयाच्वंगु दु। मजुइगु नं छाय्? गुन्डागर्दीया ज्याखँय् नांजाःपिं धाक्वसित थीथी पार्टीया रंग पानाः, आतंक मचे यानाच्वंगु धकाः सुनानं मदु धाये फइ मखु। शान्ति सुरक्षाया मू ताःचाप्वाँय् घाँय् दुगु गृह मन्त्रालय मबीकं मन्त्रिपरिषद् पूमवंकेगु धकाः माओवादीं बियाच्वंगु हाथ्या धाथें नं न्ह्यथनेबह जू। छखे मन्त्री मण्डलय् दुथ्याकाः फरर राष्ट्रिय ध्वाँय् ब्वयेकाः हाकुगु गाडी सरर यायेगुली सुया जक नुगः क्वमसाली? चाहे कमरेड जुइमा वा काम नगरेश हे छाय् मजुइमा ।

गिरिजाबाबुं झिदँतक ल्वानाच्वंगु माओवादीयात झिंनिगू बुँदाया सम्झौता यानाः वयात जंगली पार्टीं नागरिक पार्टीइ हीका बिल। थुगु कुतःयात कयाः भारतं गिरिजाबाबु नेपाःया जक राजनेता मखु एशिया महादेशया हे राजनेता खः धकाः तपुलिं नं पुइकूगु खः। थः हे बोक्सी थः हे धामी धाः थें प्रचण्डयात च्यादँ तक भारतय् सुचुकाः अनेतने विकास निर्माणया संरचनात ध्वस्त याकल। भारतीय कम्युनिष्ट पार्टीया नेता सिताराम यचुरी लमि जुयाः न्हूगु दिल्लीइ ह्वंकल ।

थुगु सम्झौतां शान्ति व संविधानया लागाय् गुलि ज्या जुल धकाः वालाः, मालाः स्वःसा जंगलं पिहां वःम्ह माओवादीं सरकार (जनतायाके) कायेधुंकल तर छु बिल धइगु न्ह्यसः ब्वलनी। आखिरथ्व फुक्व गिरिजाप्रसाद न्हापांम्ह राष्ट्रपति जुइगु तातुनां न्ह्याकूगु पलाः खः तर माओवादीं ल्वाप्पा नकल ।

थ्व सन्दर्भयात ल्वःगु छगू नीति श्लोक थथे दु: -
"मूर्ख शिष्योपदेशेन दृष्ट मुश्यानभरणेन च।।
द्विषतां संप्रयोगे पण्डितोडष्सीदति।।
गुम्ह मुनखं मूर्खम्ह शिष्ययात उपदेश बी, कुचरित्रम्ह मनूयात आवरण बी, तसकं ल्वाकाच्वनीम्ह शत्रुनाप सन्धि याइ, वं ज्ञानी, विद्वान आदि जूसां दुःख सी।। (चाणक्य)

More Stories Like this