च्वसापासाया छेँ दनेत जग तल

येँ (झीगु स्वनिगः)

नेपाल भाषाया छगू अतिकं लोकंव्हाःगु थाकुलि साहित्यिक संस्था च्वसापासाया न्हूगु छेँ दनेत म्हीग छगू ज्याझ्वःया दथुइ जग तयेगु ज्या जूगु दु । नेपालभाषा एकेडमीया चान्सलर व संस्कृतिविद् सत्यमोहन जोशीं विधिपूर्वक जग तयादीगु खः । आःयात प्यतँ जाःगु छेँ दनीगु उगु छेँय् सभाकक्ष, पुस्ताकालय् व पाण्डु लिपि संग्रहालय् दयेकीगु जूगु दु । आशा सफूकुथिया उगु जग्गाय् च्वसा पासाया उगु छेँ दनकि आशासफू कुथियात नं अःपुइगु धाःगु दु । साहित्यकारतय्गु नितिं माःगु सुविधा उगु च्वसापासां वीगु कुतः जुइगु धाःगु दु । आशा सफूकुथिं वियावयाच्वंगु ग्राहकं सेवा लिपा च्वसापासां याइगु धाःगु दु । हस्तलिपि सम्वन्धी संग्रह व अध्ययन याकेगु ज्याय् आशा सफूकुथि सीमित जुइसा मेमेगु सुविधा च्वसापासा थःम्हं याइ ।

च्वसा पासां पिकाःगु क्लासिकल डिक्सनरी पिकायेत व्यूगु ग्वाहालि व उगु सफूयात जापानसयाहे छगू संस्थां सिरपाः कथं व्यूगु ध्यबां उगु छेँ दनेत्यंगु खः । विधिगतरुपं जग तयेगु ज्याझ्वः लिपा नवायेगु झ्वलय् च्वसापासाया नायः पद्मरत्न तुलाधरं च्वसापासाया अवस्था व उद्देश्ययात कयाः स्पष्ट यानादीगु खःसा चान्सलर सत्यमोहन जोशीं आशासफूकुथि व प्रेम वहादुर कसाःया देनयात कयाः ध्वा थुइकाव्युगु खः ।
ज्याझ्वलय् सभासद् बुद्ध साय्मि, डा. केशव मान शाक्य, जनकवि दुर्गालाल श्रेष्ठ, नर्भदेश्वर प्रधान, पूर्ण वैद्य, राजा शाक्य, नरेशवीर शाक्य, अमर वज्राचार्य, भूणण श्रेष्ठ, प्रतिसरा साय्मि, डा. पुष्पराज रजकणिकार, गणेशराम लाछि, रामशरण साय्मि, डा.तेजरत्न कसाः लगायत व्यक्तिपिं मुंगु खः ।