बुंगद्यःया झिगू कर्मर्काण्ड क्वचाल

स्वनिगःया आदिवासी नेवाःतय्गु मौलिक द्यः कथं नालातःम्ह अन्नया द्यः बुंगद्यःयात म्हिगः आइतवाः झिगू कर्मकाण्ड यायेगु ज्या क्वचाःगु दु ।
दँय् दसं नेवाःतय्सं मिजं व मिसा निम्हेसित नं याइगु झिगू कर्मकाण्ड यायेगु ज्या जूगु खः । म्हेपीं ३२ कथंया चा हयाः बुंगद्यःया मूर्ति पलिस्था प्राण प्रतिस्थापनलिपा झिगू कर्मया ज्या न्ह्याकूगु खः ।
बुंगद्यःया मूर्तियात तान्त्रिक विधिकथं प्राण लिकनाः कलशतया रंगं पायेगु ज्या यानाः न्हूगु दयेकूगु मूर्तियात प्राण प्रतिस्थापना याइगु परम्परा दु ।
बुसांनिसें सिइकबले तकया कर्मकाण्ड बुगद्यःयात याइगु चलन दु । मिजंपिन्त याइगु कय्तापुजांनिसें मिसापिन्त याइगु इहि व बाह्रा तयेगु तकां याइ । उकिं बुंगद्यःया मिजं व मिसायात याइगु कर्मकाण्ड झिगू हे याइगु जुयाः मिजं नं मिसा नं द्यः खः धकाः तकं धायेगु यानाः वयाच्वंगु दु ।