साइबाबाया असली रुप

- दीपक सापकोटा

भारतया आन्ध्रप्रदेश राज्यया पुट्टपर्ती धयागु थासय् सन् १९२६ स जन्मय् जुम्ह सत्यनारायण राजु, गुम्हय्स्यां थःयात सत्य साइ बाबा खः धकाः धाल, या मृत्यु जूगु समाचारं भारतय् ला थाय् दत, नापं नेपालय्नं गुलिस्यां भगवान साइबाबाया मृत्यु धाल । साइबाबाया मृत्युइ भारतया प्रधानमन्त्री व सोहनीया गान्धी लगायत व्यक्तितय्गु विचाः वनेवं सञ्चार माध्यमं तःधंगु हे थाय् विल । बाबाया तुति अन्याइपिं नेपालय् शासकत जक मखु, व्यापारी व सर्वसाधारण न यक्को दुगुलिं नं चर्चाय् वइगु खः । थःयात जीवित वा म्वाःम्ह द्यः धाइम्ह व यक्को चमत्कार यायेगु क्षमता दुगु दावा याइम्ह साइबाबां अन्तय् थःयात नं बचय् यायेमफुत । ८५ दँया उमेरय् शरीरया फुक्कधैथें अगं ज्यामयायेवं थःम्हं दयेकातःगु अस्पतालय् सित । साइबाबां थः ९८ दँ तक्क स्वस्थ जुयाः म्वाइगु भविश्यवाणी यानातःगु खःसा व ज्याख्यलय् मवल । व वयकःया भविष्यवाणी फय्गं सावित जुल ।

साइबाबाया वारे यक्कोहे रहस्यत चर्चाय् न्यँनेदु । वं जादू यानाः पवित्र खरानी, अंगू, माः आदि ल्हातं व म्हुतुं पिकायेफू धाइ । थःयात प्रतिस्थित धाइपिं नेपाःया छुं मनूत बाबाया दर्शन यानाः थःगु ल्वय् लाःगु, समस्याया समाधान याःगु प्रचार यानातःगु दु । थुकिं सर्वसाधारण मनूयात यक्कों भ्रम जूवंगु दु । छु व अलौकिक शक्ति दुम्ह चमत्कारीक मनूहे खःला ? मखु, धात्थेंला साइबाबा सामान्य कथंया "चमत्कार" यानाः मनूतय्त भ्रम वीम्ह मध्यसारया मनूस्वयाः अप्वः छुं मखु । इन्टरनेटय् वनाः "यूट्यूव" लगायत वेभसाइटय् जादू स्वयेगु खःसा थ्व प्रष्ट जुइ । भारत लगायत राष्ट्रय् छुं लख मनूतय्त भ्रम वियाः थःयात द्यः वा भगवान धाःसां नं व छम्ह सामान्य मनूथें रोगै रोगं सित । उकिं थ्व चमत्कार क्यनीम्ह भगवान तायेकेगु मनू मात्रया मूर्खता जक खः । खः नं छुं अस्पताल, छुं भोजनालय, व छुं आश्रमत दयेकूगु दु । उगु फुक्कं वं काःगु दान चन्दां खः । वयागु क्षमता धयागु यक्को दान चन्दा कायेगु धाःसा खः ।

साइबाबाया चमत्कारय् विश्वास मयायेगु व सर्वसाधारणयात भ्रम वीगु ज्या स्यूपिं भारत लगायत थीथी देशय् मनूतय्सं साइबाबां खरानी पिकायेगु पल्सा छ्व, जाकि थें खाद्यान्न पिकाःगु जूसा पित्याःपिं भारतया नागरिकतय्सं नयेला खनी । खः छाय् साइबाबां खरानी, लुँया अंगू, व माःया पल्सा छ्व वा पिकयाः परोपकारया ज्या छाय् मयाःगु ? आः नं भारतया ३० करोड स्वयाः अप्वः मनूत निछाः नं बांलाक नये खनाच्वंगु मदु । जादू यानाः ल्वय् लंके फु धकाः दावा याःम्ह बाबां छाय् अस्पताल दयेके माःगु जुइ ? थुज्वःगु यक्कों न्ह्यसः दनावइगु स्वभाविक खः । पश्चिमय् राष्ट्रया विविसी लगायत सञ्चार माध्यमं थ्व बाबाया जादू व यौन दूराचारया वारे थीथी समाचारत प्रकाशन व प्रसारण याःगु दु । नेपालय् नं वयागु धात्थेंगु ख्वाः वा रुप न्ह्यःनेतइगु सञ्चार माध्यमतय्गु म्हो मदु ।

नेपालय् नं साइबाबाया अनुयायीइ उच्च मध्यम व उच्च वर्गया मनूत लानाच्वंगु खनेदु । सञ्चार माध्यमय् दुगु थुमिगु वर्गया प्रतिनिधितय्सं याइगु प्रचारया कारण सर्वसाधारणय् गनं साइबाबा वा थुज्वःगु बाबात चमत्कारीक व्यक्ति मखु धयागु भ्रम त दनावयेफु । थ्व बाबाया मृत्यु जुइधुंकाः नं नेपाःया सञ्चार माध्यमं तःधंगु थाय् विल । छगू दैनिकं ला विशेषांक हे पिकयाः छुं नेपाली दासतय्गु रुवावासी हे प्रकाशित यात । उकी छुं चलचित्रय् म्हिताः हिरो जुइगु मौका दुम्ह छम्हय्स्यां थः अभिभावक तंकागु धालसा नेपाली साहित्यय् नां दंपिं छम्हय्स्यां ला बाबाया दर्शनलिपा थःयात लगय् जूगु ल्वय् लंगु धाल । सचेत नागरिकयात थ्व अन्धविश्वासी दासतय्गु वुद्धि खँ खँ कपाः स्यानावइ । सुनां सुनां धाइ, बाबायाके अलौकिक वा चमत्कारीक क्षमता मदुगु खःसा भारतय् शासक, प्रशासक व सञ्चार माध्यमं छाय् अपाय्कं महत्व व्यूगु ले ? थुकिया कारण छगूला इमिके दुगु अन्धविश्वास खः, मेगु कारण साइबाबाया कारण भारत व पुट्टपर्ती जःखःया क्षेत्रय् जूगु पर्यटन विकास खः । अथ्यला साइबाबा गुम्हय्स्यां दकले अप्वः दान विल वइतहे अप्वः माया याइगुकथं खः । थ्व वाहेक उच्च माध्यम व उच्च वर्गया मनूतय्त छुंनं बाबा वा गुरुया भक्त जुइगु "फेसन" नं जुइ ।

नेपालय् साइबाबा थें स्वघोषित भगवान वा द्यः व गुरुया भक्तत म्हो मदु । पाइलट बाबा, राधेराधे थें अनेक नामधारी भारतीय बाबा, गुरु वा साधुत नेपाली अन्धविश्वासी मनूतय्त लुमंकेत नेपाः वयेगु याइ । तःधंगु पदय् दुपिं मनूत नं फेसनया नितिं व थःगु कूकर्म त्वपुइगु नितिं थुज्वःपिं बाबातय्गु शरणय् वनेगु याइ । थीथी नामधारी बाबात इलय् ब्यलय् नेपाः वइ व थःयात तःधं धाइपिं मनूतय्त तुति अन्याकी ।
भारतया स्वस्वं छुं नेपाःमितय्सं नं थःयात बाबा व गुरु धायेकेत कुतः यानाच्वंगु दु । म्वाः मदुगु गफ यायेगु काली बाबा, सर्वसाधारणयात भक्कुमार जुइक दाइम्ह रामवहादुर मवजनथें छुं नमुनात खः । थुज्वःपिं अन्धविश्वासीयात लिधँसा वीगु ज्याय् सञ्चार माध्यमत नं दोषी खः । थःयात लोकं व्हाकेत टिभि आदि नं थुज्वःपिं धोंगीतय्त इन्टरभ्यू छापय् याइ । थुकिं यानाः सर्वसाधारण जनताय् भ्रम छेरेयायेगु ज्या जुइ । गौतमवुद्धया शिक्षा कायेगु ज्या मयासे थुज्वःपिं धोगिं बाबातय्गु ल्यूल्यू ब्वां वनीपिं मनूत म्हो मदु । ल्वचं सीम्ह साइबाबाया भक्त विरेन्द्र नं खः । तर वइगु वंश नाश जुइक विरेन्द्रया हत्या जुल, तर साइबाबां छुं यायेमफु । न थःयात नितिं छुं यायेफत नत थः भक्तया हत्यां बचय् यायेफत । थुज्वःपिं धोगीं बाबाया धात्थेंगु रुप थ्व स्वयाः मेगु छु जुइ ?

More Stories Like this