थौं मन्त्रीमण्डलया विस्तार जुइगु

एकीकृत नेकपा -माओवादी) या नायः प्रचण्डया कुतलं एमालेया नायः झलनाथ खनालया नेतृत्वय् सरकार गठन जूगु लिपा गृहमन्त्रालयया कारणं विस्तार जुइमफूगु मन्त्रीमण्डलय् सम्भवत थौं प्यंगू दलया न्हय्म्ह मन्त्रीत दुथ्याइगु खनेदु । उकीमध्ये मधेसी जनअधिकार फोरमया नायः उपेन्द्र यादवयात उपप्रधान लिसे परराष्ट्र मन्त्री जुइगु खनेदुसा ल्यं स्वंगू मन्त्रालय कृषि व सहकारी, वाणिज्य व आपूर्ति अले श्रम मन्त्रालय वीगु जूगु दु । अथ्यहे मालेयात संघीय मामिला, माले समाजवादीयात विज्ञान व प्रविधि, अले संयुक्तयात वातावरण मन्त्रालय् वीगु जूगु दु । थुकी मधेसी जनअधिकार फोरमपाखें स्वंम्ह मन्त्रीत जुइपिं सुसु खः धयागु खँ क्वछीत सहलह जुयाच्वंगु धाःगु दुसा मालेपाखे वैठक च्वनाः क्वछीइगु धागु दु । माले समाजवादीपाखे सम्भवतः मूछ्याञ्जे यद्रवंश आ व संयुक्तपाखे सुनिल मानन्धरयात सरकारय् सहभागी याकीगु जुइ । न्हापा फोरमयात स्वंगू जक मन्त्रालय वीगु धकाः खँ क्वछिनातःगु खःसा फोरमया नायः यादवं उप-प्रधानमन्त्री लिसें प्यंगू मन्त्रालय् फ्वनावयाच्वंगु खः । श्रम मन्त्रालय् माओवादीयात वनेधुंकूगु सां फोरमया नितिं उगु मन्त्रालय त्वःतावीगु जुइधुंकुगु दु ।

खूगु दलया मन्त्रीमण्डल जूसां थुकियात अझ मेमेगु दलतय्त नं हइगु जूगु दु । थुकियानितिं माओवादी नायः प्रचण्डं सहलह व्याकाच्वंगु दु । हाल थुपिं खुगू दलया सरकारयाके संविधानसभाया स्वब्वय् निब्व सभासद्पिं दुगुलिं अन्तरिम संविधानकथं बहुमतं संविधान वा संविधान मस्यौदा पिथनेत संख्या गाये धुंकूगु दु । तर नेपाली कांग्रेस लगायत मधेसी मोर्चां उगु वहुमतयात स्वीकार यायेगु प्रजातान्त्रिक मान्यतायात उल्लंघन यानाः सर्वसहमतिं संविधान मस्यौदा पिकायेमाःगु खँ न्ह्यःने हयाच्वंगु दु । अथ्य धयागु आन्तरिक संविधानय् न्ह्यथनातःगु खँयात इन्कार यायेगु खः । थःयात प्रजातन्त्रवादी धायेत सःसुक्क हालाजुइम्ह नेपाली कांग्रेसं थःयात प्रजातन्त्रया विरोधीया रुपं प्रस्तुत यायेत स्वयाच्वंगु स्पष्ट दु । न्हूगु संविधान वा संविधानया मस्यौदा पिकायेत आः २६ न्हु ल्यँ दनिवलय् वर्तमान सरकारय् वयाः शान्ति व संविधान पूवंकेत ग्वाहालि यायेमाःम्ह कांग्रेसं म्वाः मदुगु खँ ल्हानाः पंगः थनाच्वंगु दु । आः वयाः सरकारयाहे नेतृत्वया दावा यानाच्वंगु दु ।

विगतया राजनीतिक अवरोधयात कयाः सुपः छ्पुहे उखेथुखे यायेमफु कांग्रेसं भ्या भचाहे मछाःमजु सं सरकारया नेतृत्वया दावा यायेगु धयागु विना अर्थ व क्षमतांया हावादारी गफ अप्वः मेगु छुंनं मखु । संविधान व शान्तिया नितिं माओवादीया लचकतायात कांग्रेस अःखतं थुइकाः स्यालय् तीगु ज्या यायेगुया छुंहे औचित्यता मदु । इतिहासं कांग्रेसं स्यनाकाये मफुसा वइगु नितिं थ्व घाटक जुइफूगु शत्ययात लोमंकेगु ज्या यायेमज्यू । शान्ति व संविधानया खँ ल्हाइम्ह कांग्रेसया व्यवहारं प्रतिगमनकारी हर्कतय् लिकुनाच्वंगु खँयात लोमंके मज्यू । थःगु इतिहास थःम्हं हुइगु ज्या यायेगु अन्ततः थःगु त्वालय् थःम्हं हाकः पायेगु खः ।

More Stories Like this