थौंकन्हय् हे सरकार पूर्ण जुइ : गौतम
येँ (झीगु स्वनिगः)
वर्तमान सरकारया नेतृत्व यानाच्वंगु नेकपा -एमाले)या वरिष्ठ नेता वामदेव गौतमं थौंकन्हय् हे वर्तमान सरकारं पूर्णता काइ धकाः धयादीगु दु । अन्तर्राष्ट्रिय श्रमिक दिवसया लसताय्पेसागत महासंघया ग्वसालय् म्हिगः आइतवाः जूगु ज्याझ्वलय् न्वंवासें एमालेया वरिष्ठ न्वकु वामदेव गौतमं अथे धयादीगु खः । वय्कलं थ्व हे सरकारं शान्ति व संविधानया ज्या पूवंकात्वःती धकाः दावी तकं यानादिल । एमालेया नेता गौतमं धयादिल 'पार्टी दुनेया थःत वजनदार धकाः थुइकीपिं नेतातसें आः थ्व सरकार ल्यनीमखु, राजीनामा बिइमाः धैगु खँ न्ह्यथनेगु यानाच्वंसां थ्व हे सरकारं शान्ति व संविधानया ज्या पूवंका हे त्वःती ।'
वय्कलं आः छुं वाःया दुने हे शान्ति प्रक्रिया व संविधान निर्माणया ठोस प्रगति जुइ धकाः नं दावी यानादिल ।
नेता गौतमं शान्ति व संविधानया आज्जु कथं संक्रमणकालयात चीहाकः यानाः न्ह्याः वनेगु झ्वलय् सरकारयात ज्यामछिंगु अवस्था नं वयेफु धयादिसें बन्द, हडताल व मागत न्ह्यःने तयाः थ्व इलय् मवनेत नं श्रमिकतय्त इनाप यानादिल ।
