आन्दोलनया नितिं २३ गते जनजातिया बृहत्त भेला

येँ (झीगु स्वनिगः)

नेपाःया आदिवासी जनजातितय्सं माग यानाच्वंगु जातीय स्वायत्तता नापं स्वशासन, आत्मनिर्णयया अधिकार नापं थीथी कथंया अधिकारया नितिं आदिवासी जनजातितय्गु मंकाः आन्दोलन न्ह्याकेगु नितिं नेवाः—तामाङ संयुक्त संघर्ष समितिं आदिवासी जनजातितय्गु बृहत्त भेला वइगु बैशाख २३ गते याइगु जूगु दु । नेवाः स्वायत्त राज्य मंकाः संघर्ष समिति व ताम्सालिङ संयुक्त संघर्ष समितिइ दुथ्याःगु घटकतय्गु म्हिगः आइतवाः मंकाः मुँज्या च्वनाः उगु कथं खँ क्वःछ्यूगु खः धकाः मंकाः संघर्ष समितिया नायः राजभाई जकःमिं जानकारी बियादीगु दु ।

उगु मुँज्यां वंगु बैशाख १४ गतेया नेवाः व ताम्सालिङ बन्द पूर्ण रुपं सफल जूगु ठहर यासें अबले ग्वहालि याःगु फुक्क पक्षयात सुभाय् देछायेगु ज्या तकं याःगु खः । थ्व हे दथुइ आः नेपाःया आदिवासी जनजातित नापं जानाः आन्दोलन यानाः वनेगु नापं आन्दोलनया हे झ्वलय् सरकारं वार्ताया नितिं औपचारिक पौ ब्यूगुयात सकारात्मक रुपं काःगु नापं आः आन्दोलन व वार्तायात नाप नापं हे यंकेगु जुइ धकाः तकं धाःगु दु ।