'पंगः थन धाःसा मसाल च्याकेगु जुइ'

राजनीतिक हस्तक्षेपकारी व पहलकदमी अप्वयेकेमाः

येँ (झीगु स्वनिगः)

एकीकृत नेकपा -माओवादी)या नायः पुष्पकमल दाहाल प्रचण्डं थःपिं शान्ति व संविधानया निर्माणया नितिं इमान्दार जुयाः न्ह्याः वनाच्वनागु इलय् उकियात पंगः थन धाःसा आन्दोलनया मसाल च्याकेगु जुइ धकाः ख्याच्वः बियादीगु दु । १२२ क्वःगु अन्तर्राष्ट्रिय श्रमिक दिवसया झ्वलय् येँय् ग्वसाःग्वःगु ज्याझ्वलय् न्वंवायेगु झ्वलय् माओवादीया नायः प्रचण्डं अथे धयादीगु खः । माओवादी जेष्ठ १४ गतेतक जनताया चाहना कथं शान्ति व संविधान निर्माणया नितिं इमानन्दार जुयाः न्ह्याः वना च्वनागु दु धकाः नं धयादिल ।

आःया अवस्थाय् थुकियात पंगः थनेगु कुतः यात धाःसा जेष्ठ १४ गतेया दिनय् हे मसाल च्याकाः न्ह्याः वनेगु जुइ अले उगु इलय् सुनां नं पनाः पने फैमखु धकाः नं धयादिल । शान्ति व संविधानयात सफल दयेकेगु नितिं फुक्क दलया ग्वहालि आवश्यक जूगु दु धयादिसें माओवादीया नायः प्रचण्डं शान्ति व संविधानया नितिं इमिसं ग्वहालि मयात धाःसा इमिसं तःधंगु मुल्य चुकेयाये माली धकाः नं ख्याच्वः बियादिल । माओवादीयात युद्धकालनंनिसें हे मजदुर व किसानतसें ग्वहालि यानाः वयाच्वंगु खः धयादिसें नायः प्रचण्डं किसान व मजदुरया हक हित व संरक्षणया नितिं थःपिसं प्रतिबद्धता प्वंकाः च्वनागु दु धकाः नं धयादिल । वय्कलं रुसय् लेनिनं शान्ति, मरि व जमिनया नारापाखें हे क्रान्ति याःगु थें हे माओवादी पार्टीं नं नागरिकं थुइकूगु कथंया सरल तरिकां हे क्रान्ति सफल यायेत स्वयाच्वनागु दु धकाः धयादिल । येँया गौशााल, बालाजु, कलंकि नापं थीथी थासं पिकाःगु जुलुस भृकुति मण्डपय् थ्यनेधुकाः जूगु सभाय् न्वंवायेगु झ्वलय् माओवादीया नायः प्रचण्डं अथे धयादीगु खः ।

थ्व हे दथुइ माओवादीया नायः प्रचण्डं मे दिवसया लसताय् पिकाःगु विज्ञप्तिइ मुलुकय् थ्व इलय् क्रान्ति व प्रतिक्रान्ति, अग्रगमन व पश्चगमन, ह्यूपाः नापं स्वाधीनता व बर्बादीया दोबाटोय् दनाच्वंगु दु धकाः धयादीगु दु ।

वय्कलं थ्व अवस्थाय् सचेत नापं संगठीत जनसमुदायपाखें राजनीतिक हस्तक्षेप व पहलकदमी अप्वयेकेमाः धकाः धयादीगु दु । विश्वन्यंकंया श्रमिक जनसमुदायात अभिवादन व निरन्तर क्रान्तिया आन्दोलनप्रति ऐक्यबद्धता प्वंकाच्वना धकाः नं विज्ञप्तिइ न्ह्यथनातःगु दु ।

नेपाःया श्रमजिवि जनतां ता ई तक सशस्त्र व शान्तिपूर्ण जनसंघर्षपाखें प्रप्त याःगु उपलब्धी वास्तवय् जनप्रतिनिधि संस्था संविधानसभायात असफल यानाः गणतन्त्र, संघीयता व धर्म निरपेक्षताया उपलब्धि तकं गुमेजुइगु खतरा जूगु वर्तमान अवस्थाय् जनताया शान्ति, संधिवान निर्माण व आमूल परिवर्तया पक्षय् न्ह्याः वनेत मे दिवसया लसताय् भिंतुना देछानाच्वना धकाः न्ह्यथनातःगु दु । मे दिवसया हे लसताय् नेपाली कांग्रेस व एमालेया मजदुर संगठनपाखें नं येँय् ब्यागलं ब्यागलं कथंया जुलुस पिकयाः ब्यागलं ब्यागलं कथंया सभा याःगु खःसा सभाय् थःथःगु दलया नेतातय्सं न्वंवानादीगु खः ।