अल कायदा प्रमुख ओसामा बिन लादेन मन्त
सन् २००१ सेप्टेम्बर ११य् अमेरिकाय् जूगु आतंककारी हमलाया मू योजनाकार ओसामा बिन लादेनयात अमेरिकी सेनां स्यानाबिउगु दु । आइतवाः बहनी अमेरिकी सैन्य फौजं पाकिस्ताया उत्तरी सीमावर्ती याःगु कारवाहीलय् अल कायदा प्रमुख लादेन नापं मेपिं स्वम्ह नं सीगु दु । उगु कारवाहीलय् लादेनया काय् व छम्ह मिसा नापं निम्ह सीगु खः ।
पाकिस्तानया राजधानी ईस्लामावादं ९० किलोमिटर उत्तरपूर्वय् लाःगु अबोतावादया छखाः छेँय् लादेन च्वनाच्वंगु इलय् उगु कारवाही न्ह्याकूगु ख: । लादेन च्वनाच्वंगु छेँ न्यादँ न्ह्यः लादेन च्वनेत हे दयेकूगु अनुमान या:गु दु ।
लादेनयात अमेरिकी सैन्य फौजं स्याःगु बारे छगू टेलिभिजन सम्बोधन मार्फत अमेरिकी राष्ट्रपति बाराक ओबामां पुष्टि याःगु दु । चान्हय् याःगु उगु सम्बोधनय् राष्ट्रपति ओबामां आतंकवाद विरुद्धया लडाई सफल जूगु धयादिसें विश्वयात शान्तिपूर्ण दयेकेगु अभियान ताःलाःगु टिप्पणी यानादिल ।
वय्कःया उगु सम्बोधन लिपा अमेरिकाया राजधानी वासिङटनस्थित ह्वाइट हाउस पिने वयाः द्वःलंद्वः अमेरिकी जनतां लसता प्वंकूगु दु । अथेहे अल कायदाया आक्रमणं ध्वस्त जुइ न्ह्यः टुइन टाउर दुगु न्यूयोर्कया ग्राउण्ड जिरोय् नं अमेरिकी ध्वाँय् सहित मनूतय्सं लसता प्वंकूगु दु ।
अल कायदां सन् २००१ सेप्टेम्बर ११य् न्यूयोर्क व वासिङ्टनय् आतंककारी हमला याःगु खः । सन् २००१ निसें अमेरिका लगायत थीथी देशं लादेनयात मालाच्वंगु खः ।
अमेरिकी अधिकारीतय् कथं हेलिकप्टर व नेभि सैन्य फौजं याःगु कारवाहीइ लादेन सीगु खः । ग्वान्टानामो बेलय् कुनातःम्ह अल कायदाया छम्ह अधिकारीया गोप्य सुचंया आधारय् अमेरिकी सुरक्षा निकायं उगु कारवाही न्ह्याकूगु खः ।
