छु खः ले टर्निङ प्वाइन्ट?
आखिर छाय् आकाझाकां हिल प्रचण्डं विद्रोहया लाइन
येँ (सन्ध्या टाइम्स)/पार्टीया पालुङटार बैठकय् तक शान्ति व संविधान मखु विद्रोह हे मुख्य लाइन खः धकाः पारित याना वःम्ह माओवादी अध्यक्ष प्रचण्डं येँय् वयाः विद्रोह मखु शान्ति व संविधान धइगु मेगु लाइन ज्वनादिल। आखिर छाय् कयादिल ले वय्कलं थ्व 'यु टर्न'? छु घटनां प्रभावित जुयाः वय्कलं विद्रोह त्वःताः शान्ति व संविधानया लाइन ज्वनादिल?
अध्यक्ष प्रचण्डं आकाझाकां धइथें विद्राह त्वःताः शान्ति व संविधानया लाइन ज्वनेवं माओवादीया हे गुलिखे कार्यकर्ता तकं अजू चायाच्वंगु खः। तर वय्कलं छाय् अज्याःगु 'यु टर्न' कयादिल धइगु खँय् धाःसा खास चर्चा मजू ।
विज्ञ सूत्रं बिउगु जानकारी कथं अध्यक्ष प्रचण्डं थुकथं बिचाः हीकूगुया मुख्य कारण नेपाली सेनापाखें सेना समायोजन बारे उकुन्हु तयार याःगु प्रस्ताव खः। नेपाली सेनां माओवादी लडाकु समेत दुथ्याकाः न्हूगु हे सुरक्षा युनिट खडा याये जिउ धकाः प्रस्ताव तयार यायेवं अध्यक्ष प्रचण्डया बिचाः हिउगु खः ।
थःगु सेनाया सुप्रिम कमाण्डर समेत जुयाच्वंगु कारणं समायोजन मजूतले थ्व सेना वय्कःया लागिं घाघः जुयाच्वनीगु स्वाभाविक खः। लिसें थ्व सेनायात लाथेपाथे ढंगं अलपत्रय् लाकेगु नं उचित जुइ मखु। थज्याःगु अवस्थाय् नेपाली सेनापाखें थःगु हे मातहतय् सेना, प्रहरी, सशस्त्र प्रहरी व माओवादी लडाकु दुथ्याःगु छगू बिस्कं फोर्स गठन यायेफु धइगु प्रस्ताव छ्वया हयेवं उकियात हे सार्थक यायेगु लागिं शान्ति व संविधानया लाइन ज्वंगु खः। माओवादीपाखें सेनां तयार याःगु उगु प्रस्तावयात स्वीकार नं यायेधुंकूगु दु ।
सेना समायोजनया ज्या राजनीतिक पार्टीतय्सं यायेमाःगु खःसां नेपाली सेना माने मजुइकं राजनीतिक पार्टीतय्सं छुं यानाः नये फइ मखु धइगु खँ माओवादीं बांलाक हे सिउ। उकिं नं वय्कलं सेनाया उगु प्रस्तावयात सकारात्मक रुपं 'रेन्पोन्ज' यायेगु लागिं विद्रोहया लाइन त्वःतेगु धकाः निर्णय कयादीगु खः। छुं जुयाः माओवादीं विद्राह यायेगु धइगु लाइन ज्वनाच्वन धाःसा कन्हय् समायोजन जुयाः नेपाली सेनाय् वनेधुंकूपिं सैनिकतय्सं नं हानं विद्रोह याइगु खः ला धइगु ग्याःचिकु दयाच्वनी। उगु समस्या समाधान यायेत वय्कलं लाइन हिलादीगु खः ।
सेनाया प्रस्तावयात नेपाली कांग्रेसं नं स्वीकार यायेधुंकूगु दु। लिसें जेठ १४ गते संविधानया मस्यौदा जकसां जारी यायेमाली धइगु माओवादीया प्रस्तावय् नं कांग्रेस सकारात्मक जुया वःगु दु ।
