न्हापां देय्यात मुक्त यायेमाः

डी.आर. खड्गी

सकारात्मक व्यक्तित्वया नेतातय्सं स्वार्थयात ध्यान मबिसे देश व जनताया कल्याणया लागिं थःगु 'भिजन' ज्वनाः न्ह्याः वनाच्वनी। सकारात्मक नेतात सत्ताय् वनाः वं देश विकास यानाः जनताया बेरोजगारी समस्या याउँक समाधान यात धाःसा जक देशय् शान्ति व आनन्दया लकस ब्वलनी। झीगु देशय् नकारात्मक व्यक्तित्वया ल्हातय् सत्ता लानाच्वंगु हुनिं हे देश व जनतायात अहित यानाः थः परिवार व जातियात जक हित यायेगु हिसाबं ज्या यानाच्वंगु खनेदु। अति बांलाःगु सुन्दर, शान्त देशय् थौं वयाः अशान्ति व अराजक जुयाच्वंगुया हुनि नं थ्व हे नकारात्मक, लोभी व स्वार्थी खस ब्रम्हू व विहारी मूलया गुण्डा नाइकेतय्गु ल्हातय् सत्ता लानाच्वंगुलिं खः। थ्व हे हुनिं यानाः थौं झीगु देश झन-झन बर्वाद जुजुं वनाच्वंगु दु। फताहा, स्वार्थी, लोभी अपराधी पुचःया आज्जु धइगु हे थःगु स्वार्थया लागि देश व जनतायात झंगः लानाः विदेशीया ईशाराय् प्याखं हुलेगु खः। झीसं थौंया नेतातय्गु स्वापू हाकुबंजाः, माफिया व विदेशी शक्तिनाप विस्तार यानाः अप्वः सम्पत्ति मुंकेगु खः धइगु खँ नं सीकेमाः ।

झीगु देशय् नेतात असक्षम, स्वार्थी जूगुलिं हे विश्व बैंक, एशियाली बैंक व विश्व मुद्रा कोषं धाःधाःथे नीति नियम दयेकाः जनतायात दुःख बियाच्वन। अझ भारतया नेतातय्गु न्ह्यःने चि नःम्ह खा थें कय्कुना च्वनेगु नं याः। भारतया नेतातय्सं न्ह्याक्व हे हेपे याःसां इपिं प्रति हे भक्तिभाव क्यनाच्वनी। यदि सक्कली नेतात खःसा भारतया नेतातय्गु न्ह्यःने भारतया दादागिरी व धम्की भाषाया सशक्त रुपं प्रतिकार याइगु जुइ। सक्कली नेता मुखुगुलिं हे भारतं न्ह्याथेंजाःगु अपमान व दबाव बिउसां नं नेतात सुंक हे च्वनाच्वन। वैशाख ७ गते बुधबार कुन्हु भारतया परराष्ट्रमन्त्री एस.एम. कृष्णा नेपाःया भ्रमणय् वःगु इलय् थनया नेतातय्त तच्वयेक घुर्कि व दबाव बियाः थःगु देशय् लिहां वन। मन्त्री एस.एम. कृष्णा नेपाःया नेतात खनाः मि जुयाच्वंगुया कारण नं थ्व हे खः। वि.सं. २०६३ सालया जनआन्दोलन याये न्ह्यः नेपाःया नेतातय्सं दिल्लीइ वनाः भारतं न्ह्याथेजाःगु शर्त तःसां पूरा याना बी धकाः बचं बियाः १२ बुँदे सहमति याना वःगु जुयाच्वन। नेतातय्सं भारतया शर्त पूरा यायेगु बचं बिउगुलिं भारतया तःधंगु आर्थिक ग्वाहालिं वि.सं.२०६३ या जनआन्दोलन सफल जुल। जब जुजु ज्ञानेन्द्रयात जनआन्दोलनं पाखा चीकल उगु हे इलय् खस ब्रम्हू नेतात सत्ताय् विराजमान जुल। सत्ता थःगु ल्हातय् वये सातकि भारतया शर्त अनुसार नागरिक विधेयक संविधानसभां पारित नं यात। मेगु शर्त विहारी मूलया नेतातय्त फुक्क पार्टीं देशया उच्चपदय् विराजमान याकेगु यात। थ्व हे कारण खः संविधानसभाय् विहारी मूलया नेतात यक्व खनेदु। नेपाःया नेतातय्सं दिल्ली सरकारया शर्त पूरा यायां वना ला च्वन तर प्रमुख शर्त सुपुर्दगी सन्धि याके माःगु दु। सुपुर्दगी सन्धि पालना याकेगु झ्वलय् वि.सं.२०६३ सालय् हे सहसचिव स्तरं प्रारम्भिक चरण धकाः सम्झौताया खाका तयार यायेधुंकल। सहसचिव स्तरं खाका तयार याःगु सन्धियात मन्त्रीमण्डलं पास याकाः संविधानसभाया दुइ तिहाई बहुमतं पास यात कि तिनि थ्व सुपुर्दगी सन्धिया प्रक्रिया पूवनी। न्हापां नागरिक विधेयकयात संविधानसभां पास यायेत बचन बियातःगु दु। तर वि.सं.२०६८ सालया दुने नं सुपुर्दगी सन्धि पास याकेत अलमल जुयाच्वंगुलिं भारत मि जुयाच्वंगु खः ।

सुपुर्दगी सन्धि भारतया लागि अति महत्वपूर्णगु सन्धि खः। छाय्धाःसा यदि थ्व सन्धि सफल याके फत धाःसा नेपाः, भारतया पूरा उपनिवेश जुइ। थ्व सन्धियात बः बियाः भारतं मुश्लिम समुदाय व चिनिया समुदाययात जक मखु नेपाःया देशभक्त जनतायात नं भारत विरुद्ध ज्या यानाच्वन धकाः ज्वना यंकेफु। खस ब्रम्हू व मधेशी नेतात सुपुर्दगी सन्धि यायेत मानसिक रुपं तयार जुयाच्वंगु खनेदु। छाय्धाःसा थ्व निथ्वलं जातिया नेतात भारतया हितया लागि ज्या यानाच्वनीपिं खः। यदि चीन व पाकिस्तानं सुपुर्दगी सन्धि याये मजिउ धकाः बः मबिउगु जूसा भारतनाप सुपुर्दगी सन्धि यायेधुंकल जुइ। भारतया मन्त्री सुपुर्दगी सन्धि नापनापं एयरपोर्टय् भारतीय सुरक्षा फौज तयेमाःगु, भारतया राजदूतावासय् नं भारतया सुरक्षा फौज तैनाथ याये माल धकाः दबाव बियाच्वंगु दु। अझ थुलि जक मखु भारतीय कम्पनीया लगानी यूटिएल (टेलिकम) पाखें पुले माःगु ९० करोड दां मिनाहा याये माःगु व मेगु डाबर कम्पनीं नक्कली सामान मियाच्वंसां मिखा तिसिना च्वनेमाः धाल। भारतीय मन्त्रीया थज्याःगु धम्कीपूर्ण अभिव्यक्तिं छगू ला नेपाःयात थःगु अधिनय् तयेगु मनसाय व मेगु नेपाःया नेतात भारतया कतांमरि जक खः धकाः क्यनेगु कुतः यानाच्वंगु दु। भारतया मन्त्रीया व्यवहार व पहःया मूल्यांकन याना स्वल धाःसा भारत नेपाःया सच्चा मित्र मजू धइगु नं क्यं। यदि नेतातय्के भचा जक देशया माया दुगु खःसा भारतया दादागिरी विरुद्ध सः तयेमाःगु खः। विशेष यानाः भारतं यानाच्वंगु थुपिं अन्यायया खँयात नेपाःया नेतातय्सं लुमंकेमाःगु खनेदु:
क) सीमा सुरक्षा बलं नेपाःमितयत अन्याय यानाच्वंगु,
ख) सीमा अतिक्रमण चरम रुपं जुयाच्वंगु,
ग) भूटानी शरणार्थीया समस्या,
घ) भारतं नेपाःया राजनीतिइ यानाच्वंगु खुल्ला हस्तक्षेप,
ङ) भारतं छ्वया हःपिं आपराधिक पुचलं तराईलय् जक मखु मेमेगु थासय् नं आतंक मचे यानाच्वंगु खँ।
भारतं नेपाःयात अनेककथं टेन्सन बियाच्वनं नं छुं हे मधासे मन्त्रीया न्ह्यःने छ्यं क्वछुनाच्वंगु खनाः फुक्क जनता अजूचायाः आक्रोशित जुयाच्वंगु दु। मेगु मछालापुसे च्वंगु खँ, भारतीय मन्त्रीया न्ह्यःने नेपाःया राजनीतिक घटनाक्रमया रिपोर्टिङ्ग यानाच्वंगु खँ खः। थुज्वःगु खँ न्यनाः जनतां नेपालय् यक्व लेन्दुप दोर्जेत खंकाच्वंगु दु ।

यदि भारतया हस्तक्षेपं मुक्त यानाः स्वतन्त्र जुइगु खःसा सारा जनता छप्पँ जुयाः राजनीतिक रुपं न्ह्यःने वयेमाः।

drkhadgi@gmail.com

More Stories Like this