शान्ति व संविधान लिपा सेना समायोजन

सत्ता साझेदार पार्टी एनेकपा (माओवादी) या नकतिनि क्वचाःगु केन्द्रीय कार्यसमितिया बैठकं अन्ततः थःपिं नं शान्ति व संविधान निर्माणया पक्षय् वनेगु धकाः निर्णय याःगु दु। अध्यक्ष प्रचण्डया पहलय् जूगु थ्व निर्णयपाखें वय्कः सम्पूर्ण शान्तिप्रेमि नेपाली जनताया सुभाय्या पात्र जुयादीगु दु ।

शान्तिया लागिं माओवादी सेनाया समायोजन मयासें मगाः। तर माओवादी सेनाया समायोजन गय् यानाः यायेगु धइगु खँय् न्ह्याबलें नं नेपाली सेनां पंगः थनीगु खः। तर लिपांगु इलय् वयाः नेपाली सेनां माओवादी लडाकु समेत दुथ्याःगु बिस्कं हे छगू फोर्स गठन यानाः सेना समायोजन यायेफइ धइगु प्रस्ताव न्ह्यःने माआवादीं उकियात लसकुस याःगु खः। अध्यक्ष प्रचण्डं आः वयाः शान्ति व संविधानया लाइन ज्वंगु नं थ्व हे यथार्थयात थुइकाः खः। थ्व ल्याखं धायेबलय् वय्कलं अतिकं पाय्छिगु इलय् शान्ति व संविधानया नीति कयादीगु दु ।

वय्कःया थ्व निर्णय पिने सर्वसाधारण दथुइ तसकं लोकंह्वाःसां पार्टी दुने धाःसा तःधंगु हे विवादया विषय जुयाच्वंगु दु। माओवादी बन्दूक नं नापं दुगु पार्टी जूगु कारणं उमि दथुइ ब्वलनीगु कचवंया अन्तिम निर्णय व्यक्तिं मयासे वहे बन्दूकं याना बीगु नं उतिकं खतरा दु। शान्ति व संविधानया पक्षय् अध्यक्ष प्रचण्ड वनेधुंकाः थ्व लाइनया विरोध यानाः उपाध्यक्ष मोहन वैद्यं नोट अफ डिसेन्ट च्वयादीगु दु। उकिया अर्थ माओवादीं शान्ति व संविधानया लाइन पारित याःसां पार्टी दुने विद्रोह याये हे मानि धइगु लाइन नं जीवित दनि धाःगु खः। छुं जुयाः शान्ति व संविधान हयेगु ज्या ताःमलात धाःसा विद्रोहया लाइन ज्वनीपिं सक्रिय जुइफु, व मसीनि ।

More Stories Like this