अन्तर्राष्ट्रिय बौद्ध सम्मेलन

शीला साय्मि

लोटस रिसर्च सेन्टरया ग्वसालय् स्वन्हुयंकं जूगु न्याक्वःगु अन्तर्राष्ट्रिय नेपालमण्डलया बौद्ध साँस्कृतिक सम्मेलन क्वचाल। सम्मेलनया उगु समापन ज्याझ्वलय् न्हय्गू बुँदाया अवधारणापत्र नं न्ह्यब्वःगु खः। स्वन्हुयंकं न्ह्याःगु उगु ऐतिहासिक सम्मेलनय् प्रा.डा. जोन सी हन्टिङटन, डा. भद्ररत्न बज्राचार्य, बौद्ध विद्वान यज्ञमानपति बज्राचार्य, डा. नरेशमान बज्राचार्य, डिना वाङ्देल, मिन बहादुर शाक्य, सुरेन्द्रमान बज्राचार्यपिंसं छसीकथं 'हिष्ट्रि अफ द स्वयम्भु', 'शैक्षिक गन्तव्य तर्फ लोटस रिसर्च सेन्टर', 'बज्रयान पूजा विधि भित्रको समाधी', 'बज्रयान: एक गुह्य', 'अरनिको एण्ड नेवार आर्टटिष्ट लेजेन्सी इन बुद्धिष्ट एशिया', 'संस्कृति बुद्धिष्ट त्रिपिटक फर सेन्चुरी', 'इम्प्याक्ट अफ महासांगिक अन बुद्धिष्ट अफ नेपालमण्डल' विषयक ज्यापौ न्ह्यब्वयादीगु खः ।

ज्याझ्वःया निन्हुया दिंकुन्हु डा. कविन्द्र बज्राचार्य व डा. चुन्दा बज्राचार्य, गौतमवीर बज्राचार्य, पुष्परत्न शाक्यपिंसं 'नेपालको बौद्ध धर्म अभ्यासको एक पक्ष सप्त विधान पूजा तथा ध्यान' व बौद्ध सम्प्रदायसं जुयाच्वंगु विकृति', 'लुम्बिनी सम्बन्धमा प्राचीन बौद्ध साहित्यहरुमा देखापरेका फरक दृष्टिकोण', 'नेवाः बौद्ध समाज र संकृति एवं संस्कार कर्ममा आभूषण' विषयक ज्यापौ न्ह्यब्वयादीगु खः ।

ज्याझ्वलय् मैत्रीय युथ संघ ख्वपपाखें पुलांगु सम्पदाया थीथी किपा लिसें विहार, देगः, स्यनाच्वंगु चैत्य, क्षतिग्रस्त प्रतापपुर, संस्कृति नाप स्वापू दुगु किपा नापं प्यक्वःगु जंक्वय् त्यपं पिहां वयाच्वंम्ह मय्जु छलमायाया किपा, आशा सफूकुथिं प्राचीन बौद्ध ग्रन्थया नापं लुँआखः वहः आखलं च्वयातःगु प्रज्ञापारमिता, प्रतापपुरया पुलांगु नक्सा, नेपाल परम्परागत बौद्ध धर्म संघ येँपाखें मण्डल ब्वज्यानापं थीथी बौद्ध मण्डलया किपात, भक्तपुर बौद्ध सम्पदापाखें बाजं, नृत्य, दिपंकर, चुडाकर्म, भ्वतंया वाद्यवादन व चर्या नृत्य बज्राचार्य पूजाविधि समिति यलपाखें पंचरक्षा पाठ, तारा पाठ, प्रज्ञापारमिता व सप्त विधानोत्तर पूजानापं अन्तिम प्रस्तुतीकथं चर्या नृत्य प्रदर्शन व नेपाल सोंकागाकाई इन्टरनेशनलपाखें 'लोटस सुत्र' ६३ पाः फ्लेक्स, कोरियन, जापानी, मंगोलियन लगायत सद्धर्म पुन्दरिक सफूया ब्वज्या नं जूगु खः। अथे हे बुसांनिसें सीबलय् तक माःगु हलंज्वलंत नं ब्वज्या जूगु खः ।

ज्याझ्वःया दकलय् लिपांगु ब्वय् मूपाहांयात मतिनाया चिं व ज्यापौ प्रस्तुतकर्तातय्त सुभाय्-पौ लःल्हायेगु ज्या जूगु खः। ज्याझ्वःया सफलतां लय्तायादीम्ह मूपाहां लुम्बिनी विश्वविद्यालयया उपकुलपति डा. त्रिरत्न मानन्धरं न्ह्यब्वःगु ज्यापौ व सहलहपाखें वःगु खँयात प्राथमिकता बियाः प्रकाशित यायेगु बिचाः प्वंकादिल। ज्याझ्वलय् मुक्कं पेरु अष्टेलिया, इंगल्याण्ड, अमेरिका, जापान, कोरिया, जर्मन, स्कटल्याण्ड, इटाली, भारत लगायतया देशं ब्वति काःगु उगु सम्मेलनय् ब्वति काःगु जानकारी ग्वसाः खलकं बिउगु दु ।

ज्याझ्वःया दथुइ न्ह्यब्वःगु अवधारणापत्रय् न्ह्यथनातःगु न्हय्गू बुँदात थुकथं दु:-
१) नेपालमण्डलया बौद्ध संस्कृति नेवाःतय्गु जक मखुसें राष्ट्रया हे म्हसीका जूगु व उकिया संरक्षणया निंतिं युवा वर्ग न्ह्यचिले माःगु,
२) नेपालमण्डलया बौद्ध धर्म, परम्परा, कर्मकाण्ड, पूजापाठय् जक सीमित मजुसे उकियात दर्शन, कला, साहित्य, लिपि, नृत्य, संगीतपाखें नं उजागर यानाः बौद्ध दर्शनया शिक्षानाप ध्यानाभ्यासया निंतिं ल्याय्म्ह पुस्तायात न्ह्यचीके माःगु,
३) विश्वन्यंक जुयाच्वंगु अशान्ति व हिंसा निराकरण यायेत छगूयां छगू मार्ग "बौद्धशिक्षा" बुद्ध जन्म जूगु देय् नेपालं न्ह्याकेमाःगु,
४) एशियाया मौलिक बौद्ध धर्म व परम्परायात प्रतिनिधित्व यानाच्वंगु नेपालमण्डलया बौद्ध साँस्कृतिक सम्पदायात विश्व सम्पदाया रुपय् सुरक्षित याये माःगु,
५) लोटस रिसर्च सेन्टर, लोटस एकेडेमी व लुम्बिनी बौद्ध विश्वविद्यालयं स्वंगुलिं सहकार्य जुयाः वनेमाःगु,
६) अप्वः यानाः ग्रन्थत व्यक्तिगत छेँय् व गुथिइ लानाच्वंगुलिं थुज्वःगु ग्रन्थतय्गु निंतिं नं अलग्ग हे अभिलेखालयलय दयेका व्यवस्थित यायेमाःगु,
७) छुं ई न्ह्यः जक जापानय् वःगु दुखदायी महाभूकम्प व सुनामीं जूगु विपत्तियात कयाः जापानी नागरिकतय्सं धैर्य धारण याये फयेमाः व आगामी इलय् उन्नतिया लँय् पंगः मवयेमा धकाः कामना याःगु दु ।

More Stories Like this