नेपालगञ्ज घोषणापत्र जारी यानाः देय् दबूया क्षेत्रीय भेला क्वचाल

नेवाः देय् दबूया मध्यपश्चिमाञ्चल व सुदूर पश्चिमाञ्चल भेला नेपालगञ्ज घोषणापत्र जारी यानाः क्वचाःगु दु ।

नेवाः पुचः बाँकेया ग्वसालय् वंगु चउलागा षष्ठी (२०६८ बैशाख १०)कुन्हु जूगु भेलां संघीय लोकतान्त्रिक गणतन्त्र नेपाल पलिस्था यायेगु आन्दोलनयात अझ प्रगतिशील, अग्रगमनकारी व जनपक्षीय स्वरुप बिया यंकेगु निर्णय याःगु दु ।

न्हूगु संविधानय् नेवाः स्वायत्त राज्य पलिस्था यानाः थःगु आदिभूमि नेपाल मण्डल क्षेत्र दुने अग्राधिकार व आत्मनिर्णयया अधिकार सहितया राज्य प्राप्त यायेत अग्रसर जुइगु निर्णय यासें भेलां नेवाःतय् अधिकार सुनिश्चि मयासाः उकिया कडा प्रतिवाद यायेगु खँ नं घोषणापत्रय् न्ह्यथनातःगु दु ।

भेलायात सम्बोधन यानादिसें मूपाहाँ नापं देय् दबूया नायः नरेश ताम्राकारं देय् संघीय लोकतान्त्रिक गणतन्त्र कथं न्हूधाः जुइत्यंगु थ्व इलय् गुगुनं प्रदेशय् नेवाःत दुथ्यासाः उगु प्रदेशय् समानुपातिक प्रतिनिधित्व जुइ कथंया अधिकार सुनिश्चित यायेत लगि नेवाः देय् दबूलिं सदां सः तयाच्वनीगु खँ कनादील ।

नेवाः पुचः बाँकेया नाय: चन्द्रलाल खेंधौमाकु श्रेष्ठया सभापत्तित्वय् जूगु ज्याझ्वलय् देय् दबूया मू छ्याञ्जे रजनी महर्जनं नेवाः देय् दबूया स्थापनाया आवश्यकता व थौ तक न्ह्याकाः वयाच्वंगु थीथी ज्याझ्वःया विषयस ध्वाथुइकादिल । अथेहे देय् दबूया केन्द्रीय दुजः माइलाबाबु द्योलां राष्ट्रिय जनगणना २०६८स देय्न्यंकया नेवा:तय्गु सहि तथ्यांक गु कथं विकेफइगु विषयस झीं पलाः न्ह्याकेमाःगु धयादिल ।

भेलाया निगूगु सत्रय् देय् दबूया नायः ताम्रकारं नेवाः देय् दबूया स्थापना व थुकिया संगठनात्मक ढाँचा नापं थीथी क्रियाक्रलाप व नेवाः स्वायत्त राज्य मंकाः संघर्ष समिति, नेवाः प्रदेश, नेवाः प्रदेश पिनेया नेवाःतय्गु हक अधिकार आदि विषयस प्रशिक्षण बियादीगु खः । अथेहे मू छ्याञ्जे महर्जनं आदिवासी जनजातिया हक अधिकार व ILO 169 विषयसं प्रशिक्षण बियादीगु खः ।

भेलाय् मध्य पश्चिम व सुदूर पश्चिमया डोटी, कैलाली, कञचनपुर, दाङ्ग, सल्यान, प्यूठान, बाँके, बर्दिया, सुर्खेत, दैलेख, रुपन्देही, अर्घाखाँची लगायत जिल्लाया आपालं नेवाः खलः पुचःनापं नेपाल आदिपासी जनजाति महासंघ बाँके शाखा, लायन्स क्लव अफ नेपालगञ्ज व थीथी राजनीतिक पार्टीया प्रतिनिधितय् व्वति दुगु खः ।

More Stories Like this