भ्रष्टाचारी विरुद्ध विशेष अदालत

येँ (झीगु स्वनिगः)

प्रधानन्यायाधीश रामप्रसाद श्रेष्ठया पदावधि क्वचाइगु ई आः छुं दिं जक ल्यं दनि । तर वय्कलं न्ह्याकूगु 'विकृति विहीन न्यायपालिका' या अभियानं धाःसा सर्वोच्च जक मखु, क्वय्या अदालततय्त नापं गतिशील दयेकूगु दु । भ्रष्टाचारया मुद्दा स्वइगु न्हापाया तहया निकाय विशेष अदालतं क्यंगु सकि्रयता उकिया प्रमाण खः । छुं ई पूर्वमन्त्री गोविन्दराज जोशी थेंज्याःपिं विरुद्ध लाःगु मुद्दा हे खारेज यानाः बिइगु उगु हे विशेष अदालत ठेक्कापट्टाय् जूगु भ्रष्टाचारयात नापं बिचाः यानाः दोषीयात सजाय बिइत्यंगु खः । वंगु वाः जक सार्वजनिक वित्तीय संस्था डुबय् याःपिं व्यापारीतय्त विशेषं कैद व तःगु धेबा जरिवाना याःगु खः ।

अथेहे प्रकृतिया निगू मुद्दाय् च्याम्ह व्यापारी दोषी तायेकूगु खः । कमसल धितोय् कर्जा कयाः राष्ट्रिय वाणिज्य बैंक डुबय् याःगु विराटगनरया मंगतुराम समूहया खुम्ह व्यापारीयात छगू अर्ब स्वीन्हय्गू करोड तका जरिवाना व डेढ वर्ष कैद जुल । थुकिइ मिलेमतो याःपिं प्यम्ह कर्मचारीतय्त दच्छिया जेल सजाय, सञ्चय कोषयात घाटा नकूम्ह नवलपरासीया निम्ह व्यापारीतय्त विशेषं झिंगुंगू करोड जरिवाना व दच्छि कैद फैसला यात । सर्वाेच्च अदालतया छम्ह न्यायाधीशं धाल, 'विशेषं बांलाःगु सकि्रयता क्यनाच्वंगु दु ।' भ्रष्टाचार अभियोगय् अख्तियारं तसकं म्हो मुद्दा न्ह्याकूगु दु । न्ह्याकूगु मध्ये नं अप्वःसिनं विशेष उन्मुक्ति काःगु खः । तर विशेषय् गौरीबहादुर कार्कीया नेतृत्व दुबलय् 'ज्या बांलाःगु' वय्कलं धयादिल । न्यायाधीशं खंगु खँ निर्धक्क जुयाः धाः व वहे कथंया फैसला यायेमफुत धाःसा तःधंगु अनर्थ जुइ,' कार्कीं धाल,' भ्रष्टाचारीया पहुँच च्वयेतक्क दइ, शुरुइ लोभ क्यनी, मन्यंसा ख्याइ, निगुलिं अवस्थाय् न्यायाधीश अविचल जूसा जक न्याय बिइफइ ।' छगू दशक न्ह्यः पलिस्था जूगु विशेष अदालतय् आःतक्क न्याम्ह न्यायाधीशं नेतृत्व यात । मगर समुदायया न्हापांम्ह न्यायाधीश तपबहादुर मगर विशेष अदालतया नं न्हापांम्ह न्यायाधीश खः ।

अनंलिपाया विशेषया नायः भूपध्वज अधिकारीया समूहया इजलासं आपालं अभियुक्तयात सफाइ बिल । हदम्यादया कारण क्यंसें गुलिसिया मुद्दा हे खारेज यानाबिल । २०६२ माघ २० गतेनिसें २०६५ कात्तिक १९ तक्क भ्रष्टाचारया मुद्दा स्वयेगु ज्याया नेतृत्व याःम्ह अधिकारी विशेषय् दकले अप्वः ई ज्या याइम्ह न्यायाधीश खः । तर वय्कलं दकले अप्वः अभियुक्तयात उन्मुक्ति बिल । नायः जुइन्ह्यः दुजःया रुपय् हे विशेषय् खुदँया अनुभव दुम्ह अधिकारीं फैसला याःगु हरेक मुद्दा सन्देहया घेराय् दु । वय्कःदथुइ कारबाही यायेमाःगु खँ सर्वाेच्चया न्यायाधीश बलराम केसीं छगू आदेशय् नापं न्ह्यथंगु खः ।