सिंया ठेकी लोप जुइगु अवस्थाय्

लमजुङ (झीगु स्वनिगः)

लमजुङया ग्रामीण क्षेत्रय् परम्परानिसें चलनय् वःगु सिंया ठेकी छ्यला बुलां तना वनाच्वंगु दु । ग्रामीण क्षेत्रय् किसानतय्सं धौ फिनाः मोही दयेकेगु व तयेगु ज्वलंया रुपय् ठेकीया छ्यला बुला जुयाः वयाच्वंगुलिइ आः पशुपालन म्हो जूगुया लिसलिसे कालीगढया अभाव जुयाः वयेवं थुकिया छ्यलाय् कमी वःगु खः । थौंकन्हय् सिंया ठेकीया पलेसा प्लाष्टिक लिसे धातुया ज्वलं छ्यला बुलाय् वयेवं मौलिक गाउँले ठेकी लोप जुइगु अवस्थाय् थ्यंगु खः । ठेकी दयेकेगु नितिं दार, कटहर, खिर्‍रो लगायतया सिं छ्यलाः वयाच्वंगुलिइ थौंकन्हय् उगु चिग्वःगु सिं म्हो दइगु व कालीगढ नापं मदइगुलिं नं छ्यलाय् कमी वःगु खः । हाकनं ठेकी दयेकेत ई अप्वः बिइगु व परिश्रम कथंया मूल्य मदइगु जूगुलिं नं कालीगढं ठेकी दयेकेगु म्हो याःगु दु । पुस्तैनी पेशाया रुपय् ठेकी दयेकाः वयाच्वंपिं लमजुङया नार्मा गाविसया बार्‍हपोलेया माइला विश्वकर्मा बौ बाज्याया इलंनिसें सिंया ठेका दयेकेगु पेशा यानाः वयाच्वंगुलिइ आः ठेकी दयेकेगु सिं वनय् वनाः सिं मदइगु, ठेकी मालीपिं ग्राहकत नं म्हो जक वःगु जानकारी ब्यूगु दु । ठेकीलिसे घ्यः तयेगु सिमाङ, धौ दयेकीगु, गुरुङ गामय् अय्लाः त्वःनेत छ्यलीगु पुचै, ज्वलं तय्गु सन्दूक लगायतया सिंया हस्तकलाया सामान थौंकन्हय् तनाः वनाच्वंगु दु ।

गां गामय् आपालं मनूतय्सं न्हापा थें सा, मेय् लहीगु हे त्वःतेधुंकूगु दु । सिंया ठेकी बिक्रीइ नं कमी वःगु वय्कःया धापू खः । सा, मेय् लहीपिंसं नं दुरु, धौ दयेकेत व मोही दयेकेत धातुया ज्वलंत छ्यलाः हःगुलिं थ्व पेशापाखें ठेकी दयेकेगु पेशा सङ्कटय् लाःगु विश्वकर्माया धापू दु । सा, मेय्या दुरु तयेत व मोही दयेकेत दारया ठेकी बांलाःगु कथं कायेगु याः । कटहर लिसे खिर्‍रो थेंज्याःगु सिंपाखें दयेकूगु ठेकीइ दयेकूगु मोही पाउँसे च्वनीगु पशुपालक किसानतय्सं धाःगु दु ।

More Stories Like this