मजदुरतय्गु नखः मजदुर दिवस थौं

थौं मे दिवस अर्थात मजदुरतय्गु नखः खः । अन्तरराष्ट्रिय मजदुर दिवस विश्व न्यंकया नाप नापं नेपालय् नं थीथी ज्याझ्वः यानाः हनाच्वंगु दु । च्याघौ ज्या, च्याघौ न्ह्याइपुकेगु व च्याघौ देनेगु वा आराम कायेगु कथं स्वंगूकथंया च्याघौया फर्मुलायात विश्वय् प्रयोगय् हःगु थौं १२२ दँ दयेधुंकूगु दु । अमेरिकाया सिकागो सहरया मजदुरतय्सं न्ह्याकूगु थुगु आन्दोलन थौं वयाः विश्वय् न्यंगु दु । तर विडम्वनाया खँ थौं नं नेपाः थें विकासोन्मुख देशय् उगु फर्मुला कार्यान्वनय् वयाच्वंगु मदु । आन्दोलनया थप संघर्ष मयाकं कार्यान्वयन जुइगु नं खनेमदु । मजदुरतय्गु समस्या समाधान यायेगु नितिं थुगु न्हि महत्वपूर्ण जू । मजदुरतय्सं फय्मालाच्वंगु थीथी समस्यात मजदुर प्रति सकारात्मक जुइमफयेकं सम्भवहे मदु धाःसां ज्यू । मजदुरतय्सं अप्वः ज्या यायेमालाच्वंगु दु । वर्षो वर्ष ज्या यानाः नं स्थायी जुइमफुपिं द्वलंद्वः मजदुरत दु । मजदुरतय्गु ज्याला नं अप्वयेकूगु मदुनि । म्हो तलवं ज्यायायेमालाच्वंगु दु । होटल, पेट्रोल पम्प, सेक्युरिटी, उद्योग लगायतय् ज्या यानाच्वंपिं मजदुरतय्गु तलव वंगु छुं लान्ह्यः जक अप्वयेकूगु खःसां मजदुरतय्गु म्होनिं १०,००० द्वः यायेमाःगु मागयात पूवंकेगु ज्या मजूयाः समस्यात वयाच्वंगु खः । अथ्य स्वयां नं छुं छुं ख्यलय् धाःसा उपलब्धीत मवःगु नं मदु, गथ्यकि, ज्यालादारी प्रथाया अन्त, तलवय् वृद्धि, विमा व्यवस्था, बोनसया व्यवस्था आदि इत्यादी ।

छगू तथ्यांक कथं नेपालय् जक १ करोड २० लख मजदुरत दु । नेपाःया रोजगारी दकले तःधंगु थाय् जुयाच्वंगु कृषि क्षेत्रय् मजदुरत अप्वः दुथें २६ प्रतिशत जक गैरकृषि क्षेत्रय् मजदुरत दु । कृषि क्षेत्रय् ५० लख मजदुरत दु । थुकी २० लख मजदुरतय्सं पुरा ज्या यानाः नं ज्याला कयाच्वंगु मदु । थुमिसं न्यूनतम ज्याला कयाः ज्या यानाच्वंगु दु । रोजगारीया ५३ प्रतिशतया ल्याखय् मिसात दुसां थुमिसं न्यूनतम ज्याला नं कायेफयाच्वंगु मदु । यौन हिंसा लगायत विभेदया कारणं मिसा मजदुरत थप समस्याय् लानाच्वंगु दु । मिसा मजदुरतय्त नं ज्याला वीगु खँय् कानून स्पष्ट मदु । सामान्यत मिजं मजदुरतय्गु लय् ५,११७ तका दुसा मिसा मजदुरतय्सं धाःसा ३,२०० तकां अप्वः काये खनाच्वंगु मदु । थ्व विभेद लगायत समस्यात चीकेमफुतले नेपालय् मजदुर दिवस हनेगु ताःमलानाच्वंगु यात संकेट कथं कायेमाः ।

दकले लिपा उद्योगपतितय्सं "नो वर्क नो पे" या फरमुला प्रयोगय् हयेत स्वयाच्वंगु दु । थ्व पूर्णत मजदुरमारा नीति खः । थुकियात उद्योगपतितय्सं ला प्रयोग हयेनं धुंकल जुइ यदि मजदुरतय्गु संगठन बमलाःगु जूसा । मजदुरत म्हिगः स्वयाः थौं व थौं स्वयाः कन्हय् संगठित जुजु वंनाच्वंगुयाहे कारणं थ्व नीति उद्योगपतितय्गु खल्तिइ लाःगु लातं । मजदुर दिवसया लसताय् आंशिक रुपं उपलब्धीमूलक जुजुं वनाच्वंगुया थ्व छगू दसि कथं कायेमाः ।

More Stories Like this