पत्रकारत येँय् वयाः आमरण अनसन

येँ (झीगु स्वनिगः)

पत्रकार महासंघ कास्कीया बैधानिक अधिवेशनया माग यानाः आन्दोलनय् क्वहां वयाच्वंपिं पोखराया क्रियाशिल पत्रकारतसें राजधानी केन्द्रीत आन्दोलन याइगु जूगु दु ।
महासंघया केन्द्रीय समितिं थःपिनिगु माग सुनुवाइ मयाःगुलिं अथे येँय् हे वयाः आन्दोलन यायेत्यंगु खः । आन्दोलनयात सशक्त कथं न्ह्यब्वाकेगु झ्वलय् झिन्हुन्ह्यःनिसें रिले अनसन च्वनाच्वंपिं स्वंगू दर्जन पत्रकारत म्हिगः शनिवाः येँय् वःगु खः ।

इपिं पत्रकार महासंघया केन्द्रीय ज्याकुथिइ पत्रकारत हे आमरण अनसन च्वनेगु धाःगु दु । अथे हे इमिसं पत्रकार महासंघया केन्द्रीय ज्याकुथिइ अनिश्चितकालीन तालाबन्दी तकं यायेगु धकाः घोषणा यानाः पोखराय् नं येँय् वःगु खः । पुनरावेदन अदालत पोखरां विपक्षया नामय् कारण देखाउ आदेश जारी याये धुंकूगु नापं मुद्धा विचाराधीन जुयाच्वंगु जूसां महाधिवेशन य् ब्वति काइपिनिगिु नां पितब्यूगुलिं केन्द्रीय कमिटीया विरुद्ध तकं इपिं सर्वोच्च अदालतय् वनी धाःगु दु ।