जेष्ठ १४ गते मस्यौदा संविधान वइ : प्रचण्ड

येँ (झीगु स्वनिगः)

एकीकृत नेकपा -माओवादी)या नायः पुष्पकमल दाहाल प्रचण्डं जेष्ठ १४ गते संविधानया मस्यौदा वइ धकाः धयादीगु दु । म्हिगः शनिवाः चितवनया भरतपुर बिमानस्थलय् संचारकर्मीतलिसे खँल्हासें वय्कलं अथे धयादीगु खः । प्रचण्डं धयादिल 'जेष्ठ १४ गे न्हूगु संविधान घोषणा यायेफैगु संभावना मदु तर संविधानया मस्यौदा धाःसा वइ ।'
वय्कलं मूमू राजनीतिक दलया दथुइ संविधान विषयसं ल्यंदनिगु ज्या न्ह्यब्वाकेत व संवैधाकि समितियात सक्रिय यायेगु सहमति जूगु दु धकाः नं जानकारी बियादिल । नायः प्रचण्डं माओवादीया केन्द्रीय समितिं नं शान्ति व संविधानया नितिं जोड ब्यूगु दु धयादिसें पार्टीइ फरक मत तयादीम्ह न्वकु मोहन बैद्य किरणपाखें नं पार्टीया निर्णय कार्यान्वयनया नितिं छप्पँजुयाः वनेगु सहमति याःगु दु धयादिल । नायः प्रचण्डं धयादिल 'माओवादी पार्टीपाखें यायेमाःगु मेहनत व कुतःयायेगु विषयसं छप्पँ छधी जुयाः वनेगु धैगु हे पार्टीया निर्णय खः ।'

भरतपुर क्यान्सर अस्पतालया विवादया बारे संचारकर्मीतय्सं न्यंगु न्ह्यसःया लिसलय् वय्कलं थौं आइतवाः स्वंगू प्रमुख दलया शिर्ष नेतातय्गु दथुइ मुँज्या च्वनाः समस्या समाधान यायेगु धयादिल । माओवादी समर्थित प्राध्यापक संघया ताम्सालिङ राज्य स्तरीय भेलाया उलेज्या यायेगु नितिं वय्कः चितवनय थ्यंगु इलय् अथे संचारकर्मीतलिसे खँ जूगु खः ।