माओवादीं उच्चस्तरीय वार्ता याइगु

येँ (झीगु स्वनिगः)

एकीकृत नेकपा -माओवादीं) शान्ति व संविधान निष्कर्षय् थ्यंकेगु नितिं प्रतिपक्ष नेपाली कांग्रेस नापं मेमेगु दलतलिसे उच्च स्तरीय वार्ता याइगु जूगु दु । पार्टीया नायः पुष्पकमल दाहाल प्रचण्डया येँया नयाँबजार लागाय् च्वंगु निवासय् थौं सुथय् च्वंगु केन्द्रीय पदाधिकारीतय्गु मुँज्यां अथे शान्ति व संविधानयात निष्कर्षय् थ्यंकेत अधिकतम कुतः यायेगु धकाः निर्णय जूगु दु धकाः मुँज्यालिपा संचारकर्मीतलिसे खँल्हासें न्वकु डा. बाबुराम भट्टराई नं जानकारी बियादीगु दु । वय्कलं धयादिल 'संविधानसभाया दक्ले तःधंगु दलया ल्याखं शान्ति व संविधानया नितिं नेतृत्वदायी भूमिका म्हितेमाः धैगु निष्कर्ष पिकयाः नेपाली कांग्रेस, एमाले व मधेसवादी दलत नाप नापं मेमेगु दलया शीर्ष नेतातलिसे सहलह यायेगु धकाः निर्णय यानागु दु ।'

माओवादीया न्वकु डा. भट्टराई नं वार्ता थौं आइतवाःनिसें हे न्ह्याकेगु जुइ धकाः तकं धयादीगु दु । उगु मुँज्यां पार्टीया केन्द्रीय समितिं वंगु शुक्रवाः पारित याःगु शान्ति व संविधानया कार्यदिशा कथंया राजनीतिक ज्याझ्वः तयारीया नितिं खाका दयेकेगु भाला पार्टीया नायः प्रचण्डयात ब्यूगु दु । शान्ति व संविधान विरोधीतय्गु चलखेल अप्वयाः वःगुलिं आः पार्टीं जनस्तरयपाखें हे शान्ति व संविधानया नितिं दबावमुलक ज्याझ्वः संचालन यायेमाःगु खँ नं उगु मुँज्यां क्वःछ्यूगु दु धकाः धाःगु दु । थ्व हे दथुइ उगु मुँज्यां वर्तमान सरकारयात हे राष्ट्रिय सरकारया रुपय् हिलेत नेपाली कांग्रेस नापं मेमेगु दलयात नं सरकारय् दुकायेगु नितिं नं कुतः यायेगु धकाः खँ क्वःछ्यूगु दु । वर्तमान सरकारय् माओवादीपाखें छ्वयेमानिपिं मन्त्रीतय्गु विषयसं नं सहलह जूगु जूसां मेगु पदाधिकारीया मुँज्यां ठोस खँ क्वःछिइ धकाः धाःगु दु । पदाधिकारीया मेगु मुँज्या कन्हय् सोमवाः च्वनी धाःगु दु ।