छगू झाका - थौंया [बाखं]

सरस्वती तुलाधर

छेँ दनेत बुँ छकू स्वःवनागु । अहो ...... बसुन्धरादोल ला छेँया छेँ जकया दोल जुइ धुंकल । न्ह्याथाय् स्व, निवासया निवास । छतँत्या, नितँ, नितँत्या, स्वतँ जाःगु छेँ जक ल्याः खानां ल्याः खाये हे मफु । थथे स्वयेबलय् नेपाः गथे विकास मजूनि धायेगु । वा पीगु बुँ छगू हे मल्यंक छेँया छेँ जक जुइधुंकल । आः गनं अन्न तरकारी सइ? अले नयेत अन्न तरकारी चीन भारतं महसें गाइ ला ! बजाः स्व इमुलिं भुने थें । लँय् स्वः हृवतं बिलि पिहांवये थें मनूत । न्ह्यात्थाय् स्व जामया जामगु । ज्याकुथिइ इलय् सुं मथ्यं । ल्वगित एम्बुलेन्सय् हे वाथावाथा कं । न्ह्याथाय् स्व, चां न्हिं जघन्य अपराध जक ।

बुँ दायेत ब्वना यंकाम्ह अमिनया कपालय् चःतिया चःति । भचा चूगु बुँ खनी । थाकुसां उखें थुखें दानाः पाय्छि ल्याः पिकायेत कुतः यानाच्वन । न्ह्याखें दाःसां ज्या मछिं । छघौति लिपा ज्या क्वचाल । जिपिं अनं लिहांवया । लँकथं लाः । तिरिमय्जुं बसुन्धरा देवी छकः दर्शन यायेगु मतिइ तल । वया बिदा हे कयावःगुलिं इलं लाः । द्यःयाथाय् थ्यन । देवा छप्वाः न्यात । पुजाज्वलं पसःत नं फ्वःफ्वः दु । तर मन्याः । नयेधुंकाः पुजा यायेगु मतिइ मल्वल हँ । निम्हसियां धेबा छाना । देगः छचाः चाः हिला । देगःया त्वाथः त्वाथलय् नच्चा नच्चापिं ल्यासे ल्याय्म्हचात फ्यतुना च्वन । निम्ह निम्ह प्यपुंक घय्घय् पुनाः । गुलिं स्कूलया ड्रेसय् । गुलिं कलेजया ड्रेसय् । सफू दुगु बाय्ग क्वबिया तःपिं नं दु । गुम्हं मिजं मचाया म्हय् छ्यं दिकाच्वंपिं । गुम्हं मिसामचाया म्हय् भ्वसुना च्वंपिं । गुलिं थवं थवय् कत्तिक्क घय्पुना च्वंपिं । इमित खनाः तिरिमय्जु दिक्क चाल ।“छे!नु नु, छु स्वयाच्वनेगु । मछाः नं मजू । यरें चाःपिं मस्त । स्वःसा ...... ग्वाय् हे मबूनिपिं मस्ततिनि । मां अबुया थः काय्म्ह्याय्पिं आखः ब्वंवन धकाः धुक्क जुयाच्वन । थिमिगु पहः स्व ...... पहः, थुइक्क ! धाथें झी बाबु नं अथे वंसा छु यायेगु काः । छिं धाःसा धाःधाःगु बियाच्वना दी । वने धाःधाःथाय् तक्क छ्वयादी । छसः ब्वः बियादी मखु । गनादी नं मखु । बाबुया बानी स्यनी धाःसा अःखतं जितः हे ब्वः बी । खतुं आःतक्क स्कूलं इलं लिबाक्क धयागु हे मवःनि । छकः निकः पासाम्हेसिथाय् वंसां फोन यायेवं लिहांवइ । छि छेँय् च्वनीम्हं कःघाये माः । जि ला न्हिच्छिं ड्यूटी यायेमाःम्ह । मखु ला ...... बिचाः यानादिसँ न्हिं । स्कूलय् अभिभावकदिं, रिजल्ट दिं खुन्हु इलय् झासँ खं ला ।” तिरिमय्जुया खँ न्यँन्यं लिहांवया च्वना । यानय् छमा सिमाया क्वय् न्याम्ह मस्त फेतुना च्वन । मैत्री बोर्डिङ्क स्कूलया ड्रेसय् निम्ह मिसामस्त स्वम्ह मिजंमस्त थें च्वं । न्ह्यने निम्ह मिजंमस्तय्गु जक ख्वाः खनेदु । इपिं मस्तिं न्हिलाः न्हिलाः नयाच्वंगु थें च्वं । इपिं थवं थवय् धित्तुधिनाः सनाच्वन । छम्ह मिसामचां मिजंमचाया ब्वःलय् छ्यं दिकातल । इपिं खनेवं जितः नं रनक्क तं वल । म्हिचां मोबाइल लिकया । प्रिन्सिपलया नम्बर डायल याना । रिसिभ यात । जिं भाजनय् कःनि मुइके थें सः मुइका । 'छिगु स्कूलया मस्त गन दु? छिके वाःचाः दु ला? का, स्वः झासँ । थन बसुन्धरादोलय् । न्याम्ह विद्यार्थीत छु यानाच्वन । थिपिं थन गथे थ्यनाच्वन?'“सरी,थौं स्कूलया न्हापांगु दिं । मिटिङ्क छगू जुयाच्वन ।” प्रिन्सिपलं क्वमालि पहलं खँ ल्हात । फोनया लाइन दित । आलपं बाय् धात्थें मस्यू, थ्व ला प्रिन्सिपलं हे जक सी ।

जिपिं छेँय् थ्यन । च्या त्वना । “थौं छगू फिल्म स्वयेमाल का, इलं लाःबलय् ।”तिरिमय्जुं इनाप यात । DVD पँ पुत्तुपुइका ।गुगु स्वयेगु गुगु स्वयेगु । जिं राजनीतिया स्वयेधाःसा तिरिमय्जुं सामाजिक विषयक स्वये धाइम्ह । निम्हेसिया खँ ल्वाकःबुकः । लिपा 'थ्री इडिएट्स'तया । शोफाय् याउँक लिधनाः फिल्म स्वयाच्वना । तिरिमय्जुया ध्यान फिल्मय् केन्द्रित मजू । वया नुगलय् न्हिनसिया खँ वात्तुवालाच्वन । व पुतुपुतु हालाहल । “ह ला ...... न्हाचः अन खनापिं सु सु जक जुइ? इपिं ला ध्वगिक्क हे स्यनीपिं जुल । म्हधिकः स्वःसा च्यागू गुंगू तगिंयापिं जक थें च्वं । तापाक्कं तिफ्याये थाकु । स्कूलय् गेटकिपरत दु । दुने उलिमछि गार्डत दु । गथे ध्वंलानाः वन जुइ । लाःसा स्कूल हे मवंसे वंपिं जकं खः ला । उखुन्हुतिनि बेबीलोन डिस्को डान्सबारया भण्डाफोर जुल । उलिमछि स्कूल व +२ या बेइज्जत जुल । टि.भि.इ क्यंपिं मस्तय् मांअबुपिनि गथे नुगः तयाच्वन जुइ ! व मस्तय्गु केरिअर हे खतम का,मखु ला? इमिगु जीवन सुधार यायेफइतिनि ला छु, धात्थें । थ्व फुक्कं विदेशीतय्गु प्रभावं हे खः । इलं इलय् New Year Evening,Food Festival या प्रोग्राम । अले कलेज बंक,स्कूल बंक । छू छु का । का स्व स्व, वसः पुनीगु ढाँचा जक स्व । खम्पा खनेदुगु । जनुपाः छ्यातां । स्वयाच्वने हे लज्या चायापुसे च्वं ।” जिं हीमी चायाः'छ फिल्म स्वयाम्ह ला कि खँ ल्हाना च्वनाम्ह । टि.भि. हे अफ याना बी ला?'

तिरिमय्जुं ख्वाः गथखेसे तयाः धाल ―“थौं जितः गथे गथे नुगः खुलुखुलु मिं” घडीं प्यताःया सुचं बिल । जिगु मिखा लुखापाखे वन । “आः ला ई जुल । झी बजि नये मत्यःनि ला ।” जिं धया । तिरिमय्जुं “थौं छकः झी पास्ता दयेकाः नयेका मज्यू ला? बाबुं नयेधाःगुलिं न्याना हयागु । दयेके धया च्वनागु तःन्हहु हे दयेधुंकल । दयेके न्हिं” धाधां भुतुलिइ वन । बाघौ ति लिपा जिगु मोबाइल न्यात । रिसिभ याना । प्रिन्सिपलया कल । “छिकपिं थौं स्कूलय् छकः थत्थें झायादी माल । जरुरी छगू ज्या दत । मेगु खँ थन हे ल्हाये ।”

जिपिं काचाकाचां स्कूलय् वना । प्रिन्सिपलया कोथाय् दुहां वना । भचा लिपा काजोल,रमन,सुसान व सुस्मिताया मां अबुपिं नं थ्यन । जिपिं अजूचाया । छाय् सःतूगु जुइ धकाः । न्हाचः छिं फोन यानादीगु हला । छिं धयादीकथं जिमिसं ज्या याना । आः धयादिसँ छिकपिन्सं धयादी थें जक जिमिसं मेगु ज्या यायेमाली । जिपिं छझाः अलमल जुल । जिमिसं छुं हे खँ मथुल । पलख लिपा रमेश सरं न्याम्हं मस्त जिमिगु न्ह्यने थनेहल । मस्त खनाः जिपिं अंगः द्यः जुल । छाय्धाःसा उपिं मध्यय् छम्ह ला जिमि हे बाउचा जुयाच्वन ।

साभार : बाखं दबू ल्याः ४।

More Stories Like this