प्रचण्डया प्रतिवेदन पारित
वैद्यपाखें नोट अफ डिसेन्ट, वैद्यया प्रतिवेदन बहसय्
येँ (सन्ध्या टाइम्स)/एकीकृत माओवादीया अध्यक्ष प्रचण्डया प्रतिवेदन थौंया केन्द्रीय कमिटी बैठकं बहुमतं पारित यात। तःन्हु न्ह्यवंनिसें न्ह्यानाच्वंगु केन्द्रीय कमिटीया बैठकं अध्यक्ष प्रचण्डं न्ह्यब्वःगु शान्ति व संविधानया प्रस्तावयात पारित याःगु खः ।
पार्टीया पालुङटार विस्तारित बैठकं शान्ति व संविधानया निंतिं न्ह्याः वनेगु तर उकी पंगः थन धाःसा विद्रोह यायेगु धकाः सहमति जूगु अवधारणाया अःखः शान्ति व संविधानया निंतिं जक वने त्यन धकाः उपाध्यक्ष मोहन वैद्य किरणं धाःसा उकी फरक मत तःगु दु ।
उपाध्यक्ष वैद्यं अध्यक्षया प्रस्ताव विरुद्ध नोट अफ डिसेन्ट च्वयादीगु दु। अथे खःसां वय्कःया फरक मतयात पार्टीया क्वय्या तहलय् तकं बहसया नितिं यंकेगु निर्णय नं बैठकं याःगु दु ।
वैद्यं तःगु फरक प्रस्तावय् शान्ति व संविधानया निंतिं न्ह्याः वनेगु जूसां जनविद्रोहया विकल्प मदुगु जुयाः विद्रोहया नितिं नं तयारी याये माःगु खँ दुथ्याः। विशेष यानाः लिपांगु इलय् प्रतिक्रान्तिकारीतय्सं शान्ति व संविधान निर्माणया ज्या पूवंके मबीगु कुतः याःगुलिं आःया अवस्थाय् शन्ति व संविधानया निंतिं न्ह्याः वनेमाःगु प्रस्ताव बहुमतं पारित याःगु खः ।
उगु बैठकं सेना समायोजनया मोडालिटी तयार यायेगु, संविधानया एकीकृत मस्यौदा तयार यायेगु नापं जेठ १४ गतेया दुने शान्ति व संविधानया पक्षय् थीथी कथंया ज्याझ्वः यायेगु निर्णय नं याःगु दु। संविधान निर्माणया झ्वलय् विवाद जुयाच्वंगु विषययात त्वःताः दलतलिसे सहलह नापं सहकार्य यानाः संविधानया एकीकृत मस्यौदा तयार यायेगु निर्णय जूगु खँ माओवादीया नेता देव गुरुङं संचारकर्मीतय्त कनादिल ।
थ्व सिबें न्ह्यःया केन्द्रीय कमिटीं विद्रोहया विकल्प मदु धकाः विद्रोहया तयारी यायेगु प्रस्ताव पारित याःगु खः। अबलय् प्रचण्ड व वैद्यं थ्व विषयय् छगू कथंया मंकाः प्रस्ताव हे दयेकाः बहुमतं पारित याःगु खःसा मेम्ह उपाध्यक्ष डा.बाबुराम भट्टराईया शान्ति व संविधानया प्रस्ताव अल्पमतय् लाःगु खः। उगु इलय् डा. भट्टराईनं नोट अफ डिसेन्ट च्वयादीगु खः। वैद्य पक्षया नेतातय्सं पार्टीया लाइन आः 'अभिव्यक्तिइ स्वतन्त्रता, ज्या यायेगुली एकरुपता' कथं हे न्ह्याः वनेगु जुइ धाःगु दु ।
माओवादीया छम्ह नेतां पार्टीया नेतातय्गु दथुइ तत्कालिन कार्ययोजनाया सवालय् एकरुपता दुसां कार्यदिशाया सवालय् फरक दृष्टिकोण जूगुलिं हे थथे ब्यागलं ब्यागलं प्रतिवेदन वयाच्वंगु खः धयादीगु दु ।
