राजनीतिया क्यान्सरं ग्रस्त अस्पताल

भरतपुरया क्यान्सर अस्पताल देशय् ब्वलंगु अराजकताया मेगु छगू नमूना जुयाः धस्वानाच्वंगु दु। अस्पतालया न्हूम्ह कार्यकारी निर्देशक नियुक्त मफुगु कारणं यानाः अन निम्ह मनूतय्सं निर्देशक पद दावी याःगुलिं गुगु विवाद पिहां वःगु खः, उकिं यानाः आः अस्पताल हे ठप्प जूगु दु। निगू पुचःया ल्वापुं यानाः अस्पतालय् हे तालं ग्वयेगु ज्या जूगु खःसा ल्वापु समाधान मजुयाः आः अस्पतालया सम्पूर्ण ज्या हे बन्द जूवंगु दु ।

कार्यकारी नियुक्तिया थ्व विवाद मूलतः राजनीतिक विवाद खः। निगू राजनीतिक पार्टीपाखें थःथः मनूयात कार्यकारी निर्देशक दयेकेगु धकाः यानाच्वंगु कुतःया लिच्वः कथं अस्पताल हे बन्द यायेमाःगु अवस्था जूगु खः। चितवनया थ्व क्यान्सर अस्पताल नेपाः जक मखु मुक्कं एशियाया हे छगू नांजाःगु अस्पताल खः। नेपाःया फुक्क हे जिल्लाया मनूत थन वासः याकेत वयेगु याः। राजनीतिक कारणं यानाः अस्पताल बन्द जुयाः आपालं विरामीत प्रभावित जूगु दु। राजनीतिलिसे छुं हे सरोकार मदुपिं मनूतनापं अस्पताल बन्दं यानाः प्रभावित जुयाच्वंगु दु। क्यान्सर थेंज्याःगु ल्वय्या विरामीतय्त थुकथं वासः तकं मयासे तया तयेगु गुलि पाय्छि खः थ्व चिकित्सकतय्सं नं बिचाः यायेमाःगु खँ खः। यदि थ्व कचवं ताःहाकः जुया वन धाःसा अस्पतालयात लिपा थ्यंकं लिच्वः लाः वनीगु खँयात नं ध्यान तयेमाः ।

उकिं थुकी आः सरकारं कडा रुपं हस्तक्षेप यायेमाःगु आवश्यकता दु। न्ह्यागु हे कथंया पलाः ल्ह्वनेमाःसां नं ल्ह्वनाः अस्पताल सञ्चालन याकेगु ज्या सरकारं यायेमाः ।

More Stories Like this