जनबिद्रोह मयासें संविधान दयेकेगु माओवादीया निर्णय

एकीकृत नेकपा माओवादीं पालुङटार मुंज्यां पारित जनविद्रोह सम्वन्धी कार्यदिशा स्थगित याना शान्ति व संविधान लेखनय् केन्द्रित जुइगु निर्णय याःगु दु । शुक्रवाः क्वचागु केन्द्रीय समिति मुंज्यां नायः पुष्पकमल दाहालया प्रतिवेदन बहुमतं पारित यायेवं माओवादीं न्हूगु कार्यदिशा निर्धाण याःगु खः । छवाः निसें न्ह्याःगु मुंज्याय् दुजःतय्सं न्ववायेगु झ्वः क्वचायेवं शुक्रवाः हे नायः दाहालं मुंज्याय् ब्वलंगु व तःगु न्ह्यसःया लिसः बियादीगु खः । मुंज्या लिपा माओवादी स्थायी कमिटि दुजः देव गुरुङं नायः दाहालं न्ह्यब्वयादीगु शान्ति व संविधान निर्माणया कार्यदिशायात बहुमतं पारीत याःगु जानकारी बियादीगु खः ।

शान्ति व संविधानया कार्यदिशा प्रति असहमति प्वंकूसें न्वकू मोहन वैद्यं न्ह्यब्वःगु प्रतिवेदन धाःसा अल्पमतय् लाःगु खः । थःगु प्रतिवेदन अल्पमतय् लायेवं वैद्यं नोट अफ डिसेन्ट च्वयादीगु खः। मुंज्याय् नायः दाहालं शान्ति व संविधान निर्माणयात निष्कर्षय् थ्यंकेमाःगु धारणा नापंया प्रतिवेदन न्ह्यब्वयादीवं न्वकू मोहन वैद्यं तत्काल जनविद्रोहलय् वनेगुया बिकल्प मदुगु धासें विस्कं प्रतिवेदन पेश यानादीगु खः । तर मुंज्याय् न्ववापिं अप्वः धयाथे दुजःतय्सं शान्ति व संविधानया पक्षय् धारणा तयेवं दाहालया प्रतिवेदन वहुमतं पारित जूगु खः । केन्द्रिय कमिटिइ सच्छि व पीन्हय्म्ह दुजः दुगुलिइ दाहालया पक्षय् सच्छि व खुम्ह दुजः खनेदत । स्वीगूम्ह दुजलं बैद्यया प्रतिवेदनय् समर्थन प्वंकूगु खः । मुंज्याय् कार्यकर्ता परिचालन सरकार निर्माण लडाकु समायोजनया मोडालिटि व एमालेनाप जूगु न्हय्गु वुंदे सम्झौता कार्यान्वयन सम्वन्धी प्रस्ताव धाःसा सर्वसम्मतिं पारित याःगु खः ।

मुंज्याय् जेठ १४ तक संविधानया एकीकृत मस्यौदा तयार यायेगु व तत्काल सरकारयात पूर्णता बिइगु विषयसं मेगु दलनाप सहलह यायेगु निर्णय नं याःगु दु । मुंज्याय् छुं दुजःतय्सं निगूलिं प्रतिवेदन लितकायेत इनाप तकं याःगु खः ।

News Location: