च्वसापासाया थःगु हे छेँ दयेकीगु

नेपालभाषाया दक्कलय् पुलांगु साहित्यिक संस्था 'च्वसापासा'या थःगु हे छेँ दनीगु जूगु दु । च्वसापासाया थौंकन्हय्या नायः भाजु पद्मरत्न तुलाधरं जानकारी बियादी कथं वइगु शनिवाः सुथसिया च्याताः इलय् येँया कुलांभुलु त्यंगलय् थःगु हे जग्गाय् छेँ नीस्वनीगु जूगु दु ।

ने.सं. १०७० दँय् भाषानिभाः प्रेमबहादुर कसाःजुं थ्व संस्था कलकत्ताय् नीस्वनादीगु खः । वि.सं. २००७ सालया प्रजातन्त्र लिपा च्वसापासां २००९ सालय् हनुमानध्वाखाया ऐतिहासिक नासःचुकय् दक्कलय् न्हापां स्वन्हुयंकं नेपालभाषाया साहित्य सम्मेलन याःगु खः ।

च्वसापासाया कुतलं 'पुलांगु नेपालभाषा खँग्वः धुकू', जापानी अनुवाद समिति, साहित्य गुथि व आशा सफूकुथि नीस्वनेगु ज्या याःगु खः ।

च्वसापासाया आः दयेकीगु न्हूगु छेँय् नेपालभाषाया घ्वानासफू पत्र पत्रिका आदिया विस्कं सफूकुथि दयेकीगु खँ सीदुगु दु । संस्थापक प्रेमबहादुर कसाःया नेपालभाषाया सफू मुनाः 'साहित्य देगः' दयेकेगु म्हगस कथं न्हूगु छेँय् घ्वानासफूया ब्व व आशा सफूकुथिइ पुलांगु पाण्डुलिपिया संग्रह च्वनीगु नायः तुलाधरं जानकारी बियादीगु दु ।

More Stories Like this