पेट्रोल अभावय् नं जेठ १४
अनुदान बीमाःसां भाः थमकाइगु
येँ (सन्ध्या टाइम्स)/बजारय् अभाव जुयाच्वंगु पेट्रोलियम पदार्थ सुलभ यायेगु खःसा पेट्रोलियम पदार्थया भाः थमकासें मगाः धकाः सुझाव वयाच्वंसां सरकारं धाःसा जेठ १४ गतेयात ध्यानय् तयाः भाः थमकायेगु निर्णय याःगु दु ।
सूत्रं बिउगु जानकारी कथं नेपाःया आयल निगमं इलय् ध्यबा मपू धकाः भारतीय पेट्रोलियम निगमं नेपाःयात छ्वया हयेगु पेट्रोल कम याना हःगु दु। थ्व अवस्थाय् पेट्रोलया आपूर्ति सहज यायेगु धाःसा कि निगमयात सरकारं निगू अर्ब तका अनुदान बी माल, कि मखुसा पेट्रोलया भाः थकाये माल धकाः दवाव बियाच्वंगु दु ।
तर जेठ १४ गते संविधान पित बीगु न्हि न्ह्यःने जनता तम्वइ कथंया छुं नं ज्या यायेत सरकार तयार जुयाच्वंगु मदु। जेठ १४ गते संविधान मवइगु जुयाः अथें नं जनता सतकय् कुहां वइगु खतरा दु। छुं जुयाः पेट्रोलया भाः थकाल धाःसा उकियात हे त्वहः दयेकाः झन तःधंगु आन्दोलन जुइफु धइगु खँयात ध्यानय् तयाः सरकारं बरु निगमयात माःसा अनुदान बी तर भाः धाःसा थकाये मखु धइगु सोच तयाच्वंगु खँ विज्ञ सूत्रं धाःगु दु ।
सूत्रं धाः कथं सरकारयात भाः थकायेगु दवाव मवयेमा धकाः आयल निगमया कार्य सञ्चालन व व्यवस्थापन सुधार यायेत गठित उच्चस्तरीय समितियात नं भाः थकायेगु सिफारिस याये मते धकाः निर्देशन वंगु दु। अय् जुयाः उगु समितिइ च्वंपिं छुं दुजःतय्सं भाः थकायेगु सिफारिस यात धाःसा थःपिंसं उकी हस्ताक्षर याये मखु धयाहःगु दु ।
निगमय् सभासद्त
थ्वहे झ्वलय् बजारय् पेट्रोलियम पदार्थया अभाव जुयाच्वंगु खँयात कयाः बुझे यायेत नेपाली कांग्रेसया सभासद्तय् छगू पुचः थौं नेपाल आयल निगम वनेत्यंगु दु। येँया सभासद् नवीन्द्रराज जोशीया नेतृत्वय् वनेत्यंगु उगु पुचलं आयल निगमया पदाधिकारीत नापलानाः अभाव जुयाच्वंगुया कारण न्यँसें याकनं सुलभ यायेत इनाप याइ धाःगु दु ।
