थौं नेवाः व तामांग लागा बन्द

सुथंनिसें थासंथासय् जुलुस

येँ (सन्ध्या टाइम्स)/ थनिं पाय्छि लछि लिपा जेठ १४ गते पूर्ण संविधान जारी यायेमाः धइगु माग यासें नेवाः व ताम्सालीङ प्रदेश जानाः थौं घोषणा यानातःगु बन्द ज्याझ्वः ताःलाकेत सुथंनिसें हे थीथी थासं जुलुस पिहां वःगु दु ।

थौं सुथय् ५:३० बजेनिसें हे येँया असं लगायत थःने व क्वःनेया थीथी लागा नापं यल, ख्वप, थिमि, तोखा, किपू, बुंग आदि थासं जुलुस
पिहां वःगु खः । उगु जुलुसं सुथय् चले याना वःगु सवारी साधन दिकाः बन्द याकेगु व चायेकेधुंकुगु पसःत नं तिकेगु ज्या याःगु खः ।

बन्द ताःलाकेत इनाप यासें म्हिगः नेवाः व ताम्सालीङ लागाया थीथी थासय् ततःधंगु मसाल जुलुस नं पिहां वःगु खः । उकी नेवाः व तामाङ आन्दोलनया थीथी व्यक्तित्वतय्सं ब्वति काःगु खः । जुलुसं थौंया बन्द ताःलाकेत थःपिनि पसः सवारी साधन बन्द यायेत इनाप याना वःगु खः । बन्दया अन्तिम इलय् वयाः सरकारं बन्द लित कायेत याःगु इनापयात बन्दकर्तातय्सं अस्वीकायाःगु दु ।

उखे थौंया बन्दय् नेवाः व ताम्सालीङ लागाया सम्पूर्ण शिक्षण संस्था कलकारखाना व रुटय् चले जुइगु यातायात बन्द जूगु दु । ताम्सालीङ लागाय् ला:गु धाडिगं, नुवाकोट, हेटौंडा आदि नगर नं बन्द जूगुलिं थौं स्वनिगलय् दुहां पिहां जुइगु यातायात नं बन्द जूगु दु । थुकिं वीरगंज भन्सार तकं प्रभावित जूवंगु दु । थौं न्हिनय् बसन्तपुली सभा याइगु ज्याझ्वः दु ।

वार्ता अस्वीकार

थौं जुयाच्वंगु बन्दयात ध्यानय् तयाः सरकारं बन्दया आह्वानकर्तातलिसे वार्ता यायेगु प्रस्ताव छ्वया हःगु दु । बन्दकर्तातय्सं थःपिंसं तयाच्वनागु
माग सरकारं पूवंके फइगु माग मखुगु कारणं यानाः सरकारलिसे वार्ता यानाया अर्थ मदु धासें उकियात अस्वीकार याना छ्वःगु< दु ।

सूत्रं बिउगु जानकारी कथं शान्तिमन्त्री वर्षमान पुन अनन्तं नेवाः-ताम्सालीङ संयुक्त संघर्ष समितियात पौ हे च्वयाः वार्ताया आह्वान याःगु खः । तर बन्दकर्तातय्सं यदि सरकारया रोहवरय् फुक्कं तःधंगु पार्टीया वरिष्ठ नेतात छथासं च्वनाः आः दयेकीगु संविधानय् नेवाः प्रदेश व तामांग प्रदेशया सुनिश्चिता जुइ धकाः प्रतिवद्धता जाहेर याइगु खःसा जक वार्ताय् च्वं वये मखुसा वये फइ मखु धाः लिसः बियाछ्वःगु खः ।