संविधानया खाका तक नं मवइगु सम्भावना
आः जेठ १४ वयेत लछि हे जक बाँकी दनि। जेठ १४ गते कुन्हु संविधान ला जारी याये फइ हे मखुत। अय् जुयाः वकुन्हु संविधानया खाका जकसां जारी यायेगु जुइ धकाः नेतातय्सं धयाहःगु खः। छाय्धाःसां ज्याजि छुं मयासे संविधानसभाया म्याद जक थपे यायेबलय् मनूतय्सं पत्याः याइ मखु धकाः नेतातय्सं संविधान दयेकेगु ज्याय् आः तक सहमति जुइधुंकूगु बुँदात छथाय् तयाः अज्याःगु खाका तयार यायेगु कुतः याःगु खः। तर संविधानया खाका तयार यायेगु धइगु नं सरकारया ज्या ला मखु। अथे यायेगु धकाः सरकारं प्रस्ताव तक हयेफु तर ज्या याइगु निकाय संविधानसभा खः। तर संविधानसभाया छुं नं निकायय् आः तक अज्याःगु खाका जकसां जेठ १४ गते कुन्हु सार्वजनिक यायेगु धकाः सहमति मजूनि। यदि सहमति जुयाः ज्या हे न्ह्याकल धाःसा नं खाका तयार यायेत ई काइतिनिगु खँ पिहां वयाच्वंगु दु ।
मेगु खँ, अज्याःगु खाका जक निं पेश याःगु धाःगुया अर्थ संविधानसभाया म्याद थपे यायेगु धाःगु खः। तर संविधानसभाय् दुथ्याःगु फुक्कं दलत संविधानसभाया म्याद थपे यायेत तयारजुयाच्वंगु मदुनि। आः नकतिनि हे छुं मधेसवादी दलतय्सं संविधानसभाया म्याद थपे याये दइ मखु धकाः सरकारयात ज्ञापनपत्र बिउगु दु। नेपाली कांग्रेस नं आः तक संविधानसभाया म्याद थपे यायेमाः धइगु पक्षय् मवःनि। स्वयम् सत्तारुढ दल एमाले दुने नं चुनाव बुनाः रन्थने जुयाच्वंपिं छुं वरिष्ठ नेतात संविधानसभाया म्याद थपे याये मजिउ धकाः हालाच्वंगु दनि। थज्याःगु अवस्थाय् जेठ १४ गते संविधानया खाका तक नं पिहां वयेत थाकुइ धइगु खँय् सायद शंका मयाःसां जिउ ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
