थःपिनि समुदायय् थः हे गुर्जु जुइगु तालिम

कृष्ण

ताः ई न्ह्यवंनिसें नायः समुदाय दुने तण्डुकार गुभाजु तयाः बुसांनिसें मदइबलय् तक यायेमाःगु थीथी संस्कार संस्कृतित न्ह्याका वयाच्वंगु खः। तर क्वन्तिया छम्ह हे जक तण्डुकार जातया उम्ह मनू ज्याथ जुइ धुंकूगुलिसें तःगू थासय् छक्वलं संस्कार संस्कृति चले यायेत वने मालीगु अवस्थायात ध्यानय् तयाः आः खड्गी सेवा समितिं यलया मोतिरत्न बज्राचार्ययात गुरु दयेकाः दच्छि तक नायः समुदायं याना वयाच्वंगु थीथी संस्कार संस्कृतिया तालिम न्ह्याकाः थःगु जाति दुने थःपिंसं हे संस्कृति संस्कारया ज्याखँत याना वनेगु पलाः न्ह्याकूगु दु। नायः जातिया हे नायः काय म्ह्याय्पिंतं थ्व तालिम बियाः लिपा उपिंपाखें हे थःपिनि संस्कार संस्कृति न्ह्याकेगु ताः तयाः उगु ज्या जूगु खः। आःयात घःसू, लत्या, खुला व श्राद्धया पूजा यायेगु ज्या स्यनेज्या जूगु खःसा लिपा कय्तापूजा, इहिपा नापं जंक्व व मेमेगु भिंज्याय् याइगु कर्मकाण्डया नं तालिम बिया वनेगु योजना दयेकूगु दु। तालिम बीम्ह गुरुजु बुंगद्यःया मूल पूजारी नं जूगुलिं जात्रा शुरु जुइवं स्वला प्यला उखे हे ब्यस्त जुइमालीगु जुया दछि न्ह्यवंनिसें न्ह्यानाच्वंगु उगु तालिम दथुइ हे क्वचायेकूगु खः ।

न्हापा शाही खड्गी जातिया थज्याःगु कर्मकाण्ड फुक्कं खुसः (तण्डुकार) तय्सं याना वयाच्वंगु खः। तर कार्यव्यस्तता व थीथी कारणं आः थःपिं हे अज्याःगु ज्याय् लगे मजुइकं मजिउगु स्थिति खने दया वःगुलिं थगुनेनिसें वालय् छन्हु थज्याःगु संस्कार स्यनेगु ज्या यलया भाजु मोतिरत्न बज्राचार्यं यानाबिज्याःगु खः। थेच्वया उमेश शाही वंगु लच्छि न्ह्यवंनिसें हे थःगु जातिया मनूतय् दथुइ अज्याःगु कर्मकाण्ड सम्पन्न यायेगु ज्याय् खटे जुइधुंकूगु दु। नापं आः काय मस्तय्त कय्ता बीगु सम्बन्धी कर्म याकेत थप तालिम काये मानिगु खँ वय्कलं कनादिल। रत्नलाल खड्गीया सम्पर्कय् वयाः गुरु कथं मोतिरत्न बज्राचार्य तालिम बीत तयार जुइवं थ्व ज्या न्ह्याःगु खः। उगु तालिम कायेत स्वीखुम्ह मनूत भर्ना जूगु खःसां उकी मध्ये झिंप्यम्हेसिनं तालिम क्वचायेकूगु दु। उकी नं च्याम्हेस्यां जक संस्कार विधिइ पास जुयाः प्रमाणपत्र कायेत ताःलाःगु खः। उकी निम्ह मिस्त नं दुथ्याः। आः वय्कःपिं नं थःगु समुदाय दथुइ थीथी ज्याया कर्मकाण्ड यायेत सक्षम जुयादीगु दु ।

मिसापिं नं थथे पूजापाठ व संस्कार चले यायेगु ज्याय् लगे जूगु प्रमाण धाःसा न्हापांनिसें हे दुगु जुयाच्वन। पौराणिक कालय् मिस्तय्सं संस्कार संस्कृति चले याना वयाच्वंगु आपालं प्रमाण दुगु ल्याखं थुकी मिसामस्तय्त नं सहभागी याकूगु खः। छेँय् छेँय् जुइगु छुं नं पूजा पाठया ज्याय् पूजा तइपिं, पूजा सामग्री मिले याइपिं ला आः नं मिस्त हे खः। उमित केवल पुजाया नेतृत्व यायेगु ज्या जक याकातःगु मदु। तर थ्व नं लिपा वयाः तिनि याःगु जुयाच्वन। खड्गी सेवा समितिं न्ह्याकूगु थ्व पलाखं खड्गी शाही समुदाय दुने सांस्कृतिक हिउपाः हइगु आशा यानातःगु दु ।

More Stories Like this