'देश विकासया लागिं विमान महःसें मगाः' : सुगतरत्न कंसाकार
नेपाल वायुसेवा निगमया कार्यकारी अध्यक्ष सुगतरत्न कंसाकारयात छुं दिं न्ह्य: विशेष अदालतं सफाइ बिइवं हानं थ:गु ज्या लिहांझायादीगु दु । वय्क: ल्यंदनिगु स्वलाया लागिं हाकनं नेपाल वायुसेवा निगमय् कार्यकारी अध्यक्ष कथं वयेधुकाः देश विकासया लागिं नेपालं अन्तर्राष्ट्रिय स्तरया सुविधा सम्पन्न दुगु विमान महःसें मगाःगु थःगु अडान लिसा कयादीगु दु । वय्कःलिसें नेपालमण्डल डटकमया लागिं पत्रकार कृष्ण प्रजापतिपाखें यानादीगु खँल्हाबल्हा थन न्ह्यब्वयाच्वना ।
० नेपाल टेलिकमय् सफलता पूर्वक व्यवस्थापन याये धुंकाः नेपाल वायुसेवा निगमय् छित मौका बिउगु सकसिनं सिउ । छित नेपाल सरकारं थथे अन्यायपूवक षडयन्त्र यानाः जेल चलन तक याइ धकाः छिं गबलें बिचाः यानादियाला?
- जिं गबलें कल्पना तक्कं मयानागु परिणति भोगे यायेमाःगु अवस्था वल । नेपाल टेलिकमय् नं न्हि निछाः नये मखंपि नेपाली जनताया छेँय् छेँय् फोन व ल्हातिइ ल्हातिइ मोवाइल फोन थ्यंकेगु धयागु इलय् आपालं मनूत पत्या मजूगु खः । लिपा अन सफलतापूवृक व्यवस्थापन यानागुलिं स्यनाच्वगु वायुसेवा निगमय् दुथ्याकूगु खः । तर देश मियाः शेष नइगुलि पल्के जुइधुंकूगु स्वभावयापिं राज्य चले याइपिं गैर जिम्मेवार मनूतय्सं षड्यन्त्र यानाः हे बैना तकं बी धुंकूगु जहाज न्यायेगु उचित प्रक्रियायात हे अपहेलना याये कथं अख्तियार व लेखा समितिपाखें रद्द याकाः सरकारं जित म्वाः मदुगु हे दुःख बिउगु खः ।
० गथे जुया अबले बैना तकं बीगु अवस्था सिर्जना जुइफत?
- विमान न्यायेगु कुतः यानागु इलय् देशय् प्रचण्ड प्रधानमन्त्री जुयाच्वंगु खः । अवलेया पर्यटन मन्त्री हिसिला यमि जुयाच्वंगु इलय् वय्कःपिंपाखें निर्णय याकाः हे उगु प्रक्रिया न्ह्यने वंगु खः । थ्व निगम पूर्ण सरकारी संस्था जूगु ल्याखं सरकारी निर्णय बिना जिमिसं छुं नं यायेगु स्थिति मदु । तर, लिपा सरकार परिवर्तन जुयाः माधव नेपाल प्रधानमन्त्री जूगु इलय् बैना रकम छ्वयेगु ज्या जुल । निगः जहाजया लागिं झगू अरव दां माःगुलि अबले ०.५प्रतिशत अथे धइगु पउने ६ करोड दां जक बैना कथं उखे छ्वयागु खः ।
० सरकारी निर्णय याकाः विमान न्यायेगु प्रक्रिया न्ह्याका नं छिता छाय् निलम्वन याःगु थें च्वं?
- नियमित रुपं ज्या यानाः बैना बीधुंकूगु निला लिपा जक लेखा समितिं व ज्या मिले मजु धाल । अथे खःसां अख्तियार व लेखा समितिं गन गुकथ ज्या याःगु मिले मजूगु खः धका: आः तक नं स्पष्ट लिसः बियेफुगु मदुनि । जिं उमिके कानूनया गुगु धारा, गुगु दफा कथं थ्व ज्या मिले मजूगु खः स्पष्ट यायेमाल धकाः हालाच्वनागु दु । तर उकिया सुनुवाइ जूगु मदु । उकिं नं थ्व जित ज्या याके मबिइगु व निगमयात दुबे यानाः व्यक्ति तःमि जुइत याःगु षड्यन्त्र खनेदु ।
० निलम्बनय् लायेधुंकाः आः हाकनं छि निगमय् हाजिर जूवंगु न्यनेदु नि?
- विशेष अदालतया पत्र बुझे यायेधुंकाः जिगु स्वला ल्यंदनिगु म्याद तकया दुने अझ नं छुं यायेमानि धइगु धारणां हे जि आः हाकनं नेपाल वायुसेवा निगमय् हाजिर जुया ज्या यानाच्वनागु दु । ऐन व प्रक्रिया कथं हे जि हाकन लिहांवयागु खः ।
० आः छिगु न्हूगु योजना छु दु?
- न्हूगु सरकार वःगु दु । न्हूम्ह मन्त्री नापं सल्लाह यानाः जिउसा निला-स्वलाया जिगु कार्यकालय् हे विमान हयेगु निंतिं हाकनं कुतः यायेगु जुइ । सरकारी निर्देशन मदयेकं थन छु यायेफइगु स्थिति मदुगुलि मेगू हप्तां निसें हे जिं विमान न्यायेगु प्रक्रियायात हाकनं शुरु यायेगु जुइ । विमान न्यायेगु प्रक्रियाय् सरकार वने हे माः । थ्व विकास निर्माणलिसें सम्बन्धित खँ खः । विकास याके मवीगु धइगु ला अपराध हे खः ।
० छु आधारय् विमान माः हे माः धइगु छिगू अडान जायज खः?
- पर्यटन व्यवसायीतय्सं सिउ कि झीगु देशय् मेमगु देशया विमानया भरय् च्वनेगु स्वया झीगु थःगु हे विमान वल धाःसा आपालं लागाय् विकास जुइ । राष्ट्रिय ध्वजाबहाक विमानत झीसं थीथी देशय् मथ्यंकूतले देशय् पर्यटकत बृद्धि याये फइमखु । याकनं पर्यटन क्षेत्रय् विकास यायेत नं झीसं विमान मन्यासें मगाये धुंकल । मेगु खँ नेपाल सरकारया ३६गू थीथी संस्थात मध्ये नेपाल वायुसेवा निगम टप टेनय् लाःगु संस्था खः । हवाइ सेवा छगू व्यापार खः । गथे बिस्कुट उद्योग चले यायेगु निंतिं बिस्कुट दयेकीगु मेसिन आवश्यक जुइ । अथेहे हवाई सेवाया लागि थःगु हे हवाई विमान मदयेकं मगाः । निगमयात थ्व उपकरण माः हे माः । आः झीके दुगु विमान नीन्यादँनिसें पीनिदँ तक पुलां जुयाः मर्मत खर्च अप्वः जुजुं वनाच्वगु जहाजत खः । अथे जुयाः निगमयाके दुगु तःग्वःगु अन्तर्राष्ट्रिय उडान निगः व मेगु न्ह्य्गः आन्तरिक उडान नाप यानाः गुंगः विमान भ्याये हे मजुइ धुंकल । थाइ एयरलायन्स नापं नीखुगू एयरलाइन्स नापं प्रतिश्पर्धा यायेमाःगु थ्व इलय् तक यदि वायुसेवा निगम विमानहीन याना च्वनेगु खःसा व निगम बन्द यायेगु लाकि चले यायेगु धइगु सवाललिसें सम्वन्धित जुइ । अथे जुया ५२ दँया इतिहास दुगु नेपाल वायुसेवा निगमयात चले हे यायेगु खःसा निगम जहाज मन्यासें हे मगाये धुंकूगु अवस्था वये धूंकूगु दु ।
० विमान हयेवं हे झी याकनं विकास जुइ धइगु छुं ग्यारेन्टी?
- वायुसेवा निगमं ७५ अरवया बार्षिक व्यापार याइ । थुंकिं साधे छ अर्व सरकारयात वार्षिक राजश्व जक पुलाच्वंगु दु । आः निगू विमान दुत हये फत धाःसा स्वदँया दुने हे राजश्व संकलन १४ अर्व थ्यनी । निगम दुनेया १४सय कर्मचारीतय् थासय् मेमेपिं नं कर्मचारीत अप्वयेकाः रोजगार सिर्जना यायेफइ । नापं मेमेगु कथं नं अनुपातिक विकास जूवनी । कर्मचारीतय्सं थप तलव व बोनस नं नयेखनी । हवाई विमान मवःगु कारणं थथे झीसं हये फइगु दां नं नीखुगू एयरलाइन्स कम्पनीतय्सं दावासाही यानाः यंकाच्वंगु दु । झी विकास मजूगु, रोजगार मदुगु नं निगमयात विमान न्याके मबीगु अपराधं याना हे खः ।
० छित जेल मुक्त यायेगु निंतिं नेवाः जागरण मञ्च लगायत नेवाः संघ संस्थातय्सं आपालं ग्वाहालि याःगुलि छिं गथे तायेकादिया?
- गैर नेवाःतय्सं स्वयां नेवाःतय्सं जिगु विषयय् अप्वः चिउताः तइगु स्वाभाविक खः । जिगु बारे न्हापां अप्वः चिउताः तइपिं जिगू परिवार, नेवाः परिवार खः । वयां जिपा जिगू नेवाः समुदाय खः। थुकियात साम्प्रदायिक धाये मजिउ । थ्व छम्ह नेवाःयात परे जूगु अन्यायया विरोधय् मेम्ह नेवालं सः थ्वयेका बिउगु बांलागु हे पक्ष खः । अथे ला जित अन्याय परे जुल धकाः जिगु पेशागत संगठन नेपाल इन्जिनियर एशोसियसनपाखें नं आन्दोलन याःगु हे खः ।
० आः छिं थःगु ज्या गुकथ न्ह्यज्याकादियेगु सोच दु?
- जिगु अन म्याद धइगु आः स्वला हे जक दनि । निदँ-निदँया म्यादय् नीछला फुइ धुंकल । थ्व राजनीतिक नियुक्ति खः । सरकारं माल धाःसा जित छक्वलं प्यदँया लागिं नं अन म्याद थप यायेफु । तर उकिया लागिं जिं सुयातं चाकडी यायेमखु । बरु नेवाः न्ह्यलुवापिनि ग्वाहालि काये । विकास निर्माणय् राजनीति यायेमजिउ धाइम्ह मनू खः, जि । राजनीतिं हे झी लिपा लाःगु खः । पउने ३ अरब जनता राजनीति मखु रोजगारी फ्वनाच्वंगु दु । विकसित देशया आधार धइगु प्रतिव्यक्ति आयश्रोत गुलि धइगु खः । झी निश्चय न एशियाय् हे दककलय् म्हो आय-आर्जन याइपिं जनता जुयाच्वंगु दु । उकि मुलुक थकायेत खुल्ला मञ्चय् भाषण याना मखु ज्या याना कयनेमाःगु अवस्था वयाच्वगु दु । जि ज्या यायेत तयार दु । मौका बिल धाःसा थःगु प्रविधि व अनुभवयात सदुपयोग यानाः थ्व देशयात च्वन्ह्याकेगु जइ ।
Related Stories
कंसाकार विरुद्धया मुद्दा षड्यन्त्रमूलक : जागरण मञ्च कंसाकार जेल चलान सुगतरत्नया समर्थनय् जुलुस कंसाकारयात कारवाही विरुद्ध नेवाःत सतकय् कंसाकार विरुद्धया कारवाही खारेज यायेत नेवाःतय् माग कंसाकारया पक्षय् संघर्ष यायेत समिति गठन 'कंसाकार प्रकरण इमान्दार नागरिकत प्रति जूगु षड्यन्त्र'More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
