थौं थाय्थासय् मसाल जुलुस
कन्हय्या बन्द ताःलाकेत सकसितं इनाप
येँ (सन्ध्या टाइम्स)/नेवाः व ताम्सालीङ जानाः कन्हय् यायेत्यंगु नेवाः नापं ताम्सालीङ लागा बन्द ज्याझ्वः ताःलाकेत थौं नेपालमण्डल लागाया थीथी थासय् मसाल जुलुस पिकाइगु ग्वसाः दु। कन्हय् बन्द ताःलाकेगु लागिं कन्हय् सुथय् नं थीथी थासं जुलुस व र्याली पिकयाः चाःहिलीगु ज्याझ्वः दयेकातःगु दु ।
नेवाः-ताम्सालीङ संयुक्त संघर्ष समितिपाखें पित बिउगु जानकारी कथं कन्हय्या बन्द ताःलाकेगु लागिं म्होतिं नं झिगू थासं छक्वलं मसाल जुलुस पिकायेत्यंगु दु। थौं सनिलया ५ बजे येँया रत्नपार्कं मसाल जुलुस पिहां वइसा यलय् ६ बजे यलध्वाखां मसाल जुलुस पिकायेत्यंगु दु। अथे हे ख्वपय् ६ बजे सूर्यविनायकं मसाल जुलुस पिकायेत्यंगु दुसा थिमिइ ६ बजे नगदेशं मसाल जुलुस पिकायेत्यंगु दु। उकथं हे किपुली सनिलया ६ बजे क्वाच्वं मसाल जुलुस पिहां वइसा बुंगय् करुणामय बहालं, तोखाय् सरस्वतीस्थानं व जोरपाटीं नं मसाल जुलुस पिकायेगु तयारी जुयाच्वंगु दु ।
कन्हय्या बन्द ताःलाकेगु लागिं सुथय् ५.३० बजेनिसें हे थीथी थासं जुलुस पिकाइगु ग्वसाः दु। कन्हय् येँय् असनं, यलय् मंगलबजारं, ख्वपय् सूर्यविनायकं,थिमिइ शंखधर चोकं, किपुली पांगा दुवातं, तोखाय् सरस्वतीस्थानं, बुंगय् करुणामय बाहालं र्याली पिकासें देय्चाःहिली। न्हिनय् येँया बसन्तपुली छगू वृहत् सभा यानाः बन्द ज्याझ्वः क्वचायेकीगु ग्वसाः दु ।
कन्हय्या बन्दय् एम्बुलेन्स, प्रेस, विरामी, मानवाधिकार, प्रहरी आदिया गाडी धाःसा चले याके बीगु खँ संघर्ष समितिं धाःगु दु ।
