जेठ १४ गते तक पेट्रोलया भाः स्थिर
प्रमपाखें अर्थमन्त्रीया प्रस्ताव अस्वीकार
येँ (सन्ध्या टाइम्स)/सरकारं संविधान जारी यायेत थप जूगु म्याद वइगु जेठ १४ गते तकया निंतिं गुगुं हालतय् नं पेट्रोलियम पदार्थय् भाः थमकाइगु जूगु दु। विकास बजेट क्वपालाः निगमयात त्यासा बीमफइगु जूगुलिं पेट्रोलियम पदार्थय् भाः थकायेत उपप्रधान नापं अर्थमन्त्री भरतमोहन अधिकारी तयादीगु प्रस्तावय् प्रधानमन्त्री झलनाथ खनालं असहमति प्वंकादीगु खः ।
प्रम खनालं न्हूगु संविधान जारी यायेगु दिं सतिना वयाच्वंगु इलय् भाः थकात धाःसा 'शान्ति व संविधान' आः न्ह्यानाच्वंगु प्रक्रिया खतराय् लायेफुगु सम्भावना दुगु धासें उगु प्रस्तावया पलेसा मेगु हे विकल्प मालेत नं निर्देशन बियादीगु खः। स्रोतं बिउगु जानकारी कथं न्हूगु संविधान जारी यायेगु ईतकया दुने गुगुं हालतय् नं पेट्रोलियम पदार्थय् भाः थकायेत प्रम तयार जुयाच्वंगु मदु।
भाः थकायेगु पलेसा पेट्रोलियम पदार्थय् कर छुट बीगु व भारत नापं भंसार फिर्ता खारेज यायेगु वा अज्याःगु हे मेमेगु विकल्प पालेगु विषयय् मुख्य सचिवया लिसें वाणिज्य व अर्थमन्त्रालयया अधिकारीत नापं तःक्वःमछिं हे सहलह याये धुंकूगु दु ।
निगम सुधारया निंतिं गठन जूगु उच्च स्तरीय आयोगं बिउगु प्रतिवेदनया लिधंसाय् निगमया नीतिगत विषययात समेत पुनरावलोकन यानाः कार्यान्वयनय् हये फइगु प्रमया बिचाः खः ।
अन्तर्राष्ट्रिय बजारय् अस्वभाविक रुपं थहां वनाच्वंगु चिकंया भाः कुहां मवयेकं सरकारं इन्धनय् कर छुटया उपाये नालयेमाःगु प्रम खनालया धापू दु ।
