अडान त्वःतेवं जक शान्ति वइगु मखु

माओवादी अध्यक्ष प्रचण्डं आः जनविद्रोह मखु शान्ति व संविधान हे थःपिनिगु न्हूगु राजनीतिक लाइन खः धकाः न्ह्यःने हःगु बिचाःयात कयाः माओवादी दुने बिचाः मन्थन शुरु जूगु दु। वय्कलं हःगु थ्व बिचाःयात पार्र्टी उपाध्यक्ष मोहन वैद्य (किरण) पाखें प्रतिरोध वयाच्वंगु दुसा उकियात समेत सामना यानाः अध्यक्ष प्रचण्ड न्ह्यःने न्ह्याः वनाच्वंगु दु। अथे खःसां केन्द्रीय कमिटीया अधिकांश दुजःतय्सं अध्यक्षया प्रस्तावयात समर्थन यानाच्वंगु कारणं वय्कःया थ्व प्रस्ताव पारित जुइगु सम्भावना यक्व दु
।
अध्यक्ष प्रचण्डं थौंया ई, विश्व सन्दर्भ व आम नेपाली जनताया चाहनायात थुइकाः हे शान्ति व संविधानया लाइनयात प्रस्तावित यानादीगु खँय् शंका मदु। वय्कःया थ्व बिचाःयात आः माओवादी नं थाके जूगु वा पाजेरो संस्कारय् लुकुं बीधुंकूगु आदि आदि कारणं शान्तिया पक्षय् वःगु धकाः व्याख्या यायेगु पाय्छि जुइ मखु। माओवादी दुने जनविद्रोह हे यायेमाः धाइपिनिगु पुचः नं सक्रिय दनिगु कारणं थ्व इलय् माओवादीयात अपमानित याये कथंया ज्या जुल धाःसा उपिं शान्ति व संविधानया लाइनपाखें लिहां नं वनेफु ।

मेगु खँ, शान्ति व संविधान थौंया चाहना खःसां अपूर्ण शान्ति व अपूर्ण संविधानयात धाःसा जनतां स्वीकार याइ मखु थ्व खँयात नं अध्यक्ष प्रचण्डं थुइकेमाः। शान्ति व संविधान हयेगु लागिं अध्यक्ष प्रचण्डं आदिवासी जनजातिया लागिं हयाच्वंगु बिचाः त्याग याःगु चर्चा नं पिहां वयाच्वंगु दु। व अवस्थाय् वय्कः शान्तिया पक्षय् वंसां मेगु पुचःपाखें अशान्ति सिर्जना जुइफुगु खँय् सकस्यां ध्यान वनेमाः ।

More Stories Like this