सुथ लूगु आभास जुइ

नर्मदेश्वर प्रधान

खँयाखँय्
हटौंडा। बहनीपाखेर थ्यनी। मत मदु। लोडसेडिङ। लिबाःगु मखु। अय्नं प्यखेरं खिउँ। झिझां दं। जि। ज्ञानबहादुरया छेँपाखेर वनाच्वने। पचिपचि यानाः न्ह्याः वने। गुगु छेँ म्हसीके मफु। अय्नं ज्ञानबहादुरया नां काये। सःतुसःतुं वने। थाय् ला उखेर हे खः। छेँ जक थ्याक्क सीके मफु। न्हापा नं वये धुन। ज्ञानबहादुरया न्हूगु बंगला मामां वने। सीके फइ। विश्वास काये। खिउँ। नां कयाः सःते। न्ह्याः वने। छखा छेँ दुनें धया हइ �भचा च्वय्....।" धुक्क जुइ। मन च्वनी। छेँ लुइके फइ। छखा छेँ वइ। अन दी। "ज्ञानबहादुर ज्ञान बहादुर.....।" सःते। ततःसः याये। नां काये। ज्ञानबहादुर दुनें हाला हइ। जिगु सः म्हसीकी। "वल वल" धया हइ। खापा चायेकी। "मत मदु।" याकनं द्यनेगु जिपिं। "वं धाइ।" जि वयाच्वनागु खँ कने। "छंथाय् छचा च्वने।" जिं धाये। व लय्ताइ। जि उकुन्हु अन हे च्वने। द्यनेगु व्यवस्था जुइ। ज्ञानबहादुरया कलाः थःछेँय् खनी। ज्ञानबहादुर पुलाम्ह दोस्ती। सतीम्ह। थः हे दाजुकिजा थें। उकिं वयाथाय् वयाच्वना। दः मछिं मताः। खाता, लासा, सिलःया व्यवस्था जुइ। जि द्यने। मिखा तिसी। मत दुगु मखु। न्ह्यः वयेकेत स्वये। न्ह्यः मवः। मनय् खँत लुयाच्वनी। खुइदँ न्ह्यःया खँत। सिनेमा थें। जिगु मिखाया पर्दाय् न्ह्यानाच्वनी ।

जि उबलय् मचा हे तिनि। रामबहादुर जिमिथाय् ज्या यायेत च्वनाच्वंम्ह। उबलय् रामबहादुरया ब्याहा जुइधुंकल। कलाः छेँय्। व याकःचा जिमिथाय्। परिवार त्वःता वइ। व च्वनीगु डेरा। जिगु मिखाय् दं वइ। जिमि छेँया छकू छ्यलि। न्हिनय् हे खिउँगु। चीधंगु। व रामबहादुरया क्वथा जुइ। अन मत मदु। बहनी वं तुकि च्याकी। जिमि छेँय् उबलय् मत वयेधुंकल। थौं जिगु मतिइ न्ह्यसः दनाच्वनी। वइगु डेराय् छाय् मत छप्वाः तया मबिउगु जुइ।शायद। ज्या याइम्हेसिया डेराय् मत तये मजिउ। उबलय्या मान्यता जुइमाः। रामबहादुरं जिमिथाय् सुथंनिसेँ बहनी तकं ज्या याइ। जि मचा तिनि। अय्नं लुमं। उबलय् जिमि संयुक्त परिवार। तः जहान। तःबाः। ककापिं फुक्कं छथाय्। रामबहादुरं उबलय् यक्वसियां सेवा यायेमाः। ला ल्ह्ययेमाः। बजार वनी। भौमचात थःछेँय् तःवनी। उबलय् उखेंथुखें वनेत छुं सुविधा मदु। मचातय्त बुयाः रामबहादुरं उखेथुखे यंकी। यलय् थ्यंक वनाः भौमचा काः वनेमाः। न्हिछि ज्या प्वनीमखु। छता न छता दयाच्वनी। झिम्हेस्यां ज्या ब्वइ। गुलिस्यां तं क्यनी। ल्हाः तुति मदिक्क संकाच्वंसा सकल लय्ताइ। सुम्क च्वने दुगु मखु। रामबहादुर। जिगु पुलांगु छेँ थहां कुहां जुयाच्वंगु थौं थे च्वनी। च्यः जीवन गय् जुइ? सीकेगु रामबहादुर दः थौं सफू जुइ....।

रामबहादुरं थःगु खाना थम्हं हे दयेकी। डेराय्। सुथ, बहनी फुर्सद दत कि डेराय् वनी। छकः निकः वं डेराय् खाना दयेकाच्वंगु। नयाच्वंगु खं। अक्सर धेरो दयेकी। केँ, तरकारी दयेका च्वनीमखु। नयेगु ज्वलं वं छेँनं हइ। थौं मती लुइ। नयेगु ज्वलं छाय् छेँनं हयेमाःगु वं? थन बजारय् न्याःसां जिउ नि। शहरय् न्ह्यागु नं न्याये दु। गामंनिसें छाय् दुःख सियाहइ? नयेगु ज्वलं। जिं बिचाः याये। थुइके। रामबहादुरया व मजबुरी जुइमाः। उबलय् रामबहादुरया गुलि तलब। जिं मसिउ। तर जिं अन्दाज यायेफु। जिमि बानं वयात तलब बीगु। गुलि बिउ जुइ ! जिमि बाया हे गुलि तलब दइ धकाः उबलय् अन्दाज याये। वया तलब झिंन्यातकां अप्वः ला जुइ हे मखु। खतुं उबलय् झिंन्यातकां धइगु नं म्हो मखु। अय्नं नयेगु ज्वलं, चि चिकं न्यायेमाःसा वं गुलि ध्यबा मुंकीगु जुइ। उकिं हे वं छेँनं नयेगु ज्वलं ज्वनावइगु जुइ। झितका-झिंन्यातका दां थइ। छेँय् यंकी। रामबहादुरया उबलय्या आर्जन उलि हे जुइ। झिंन्यातकाया लागिं वं छेँ त्वःता वइ । व कलाः परिवारलिसे तापाइ। रामबहादुरं कलाः परिवार गय् त्वःताच्वन जुइ ! खँ लुमंलुमं थौं नं जि अजू चाये। थ्व गय् सम्भव जुल जुइ। खुला-प्यलाय् छकः नं व छेँ वनी मखु। वं गय् मन तयाच्वन जुइ ! गुलिसित कलाः छचा नापं मदइबलय् तनमन वाथावाथा कनी। लांलां कलाःलिसे बायाः गय् च्वन जुइ व। ज्या यायां वयात कलाः लुमंकेगु फुर्सद हे मदु जुइ। ज्यां त्यानुइ। मस्त न्ह्यः वः जुइ। जिं मेगु अन्दाज कल्पना याये फइ मखु। रामबहादुर जिमिथासं वनी। हुलाकय् जागिर नइ। वया काय् म्ह्याय्पिं दइ। तःधिकःम्ह काय। ब्वंके। शहरय् तये। वया मनय् वइ। जिमिथाय् ब्वना हइ। तइ। स्कूलय् वनी। ब्वनी। रामबहादुरया काय जिमि पासा थें। झीगु पासा जुइवं हे वं जागिर नइ। रामबहादुरया मेम्ह काय्। कानून ब्वनी। दुःख सुख यानाः रामबहादुरं मस्त ब्वलंकी। तःधिकः याइ। वया आर्थिक अवस्था बांलाइ। पहाडया बुँ मी। तराई पाखेर वनी। च्वनी। कायपिनि नं आम्दानी दइ। येँय् छेँ दयेकी....। निदँ न्ह्यः रामबहादुर मदइ। खुइदँ न्ह्यःया रामबहादुर। चलचित्र जुयाः जिगु न्ह्यःने खने दइ ।

जि। थौं हेटौडाय्। ज्ञानबहादुरया बंगलाय्। थौं थन लोडसेडिङ। द्यनेत लासाय् मिखा तिसी। तर जिं मिखां फुक्क खं थें जुइ। ज्ञानबहादुरया हेटौंडाय् जागिर। वं थन छेँ दयेकी। व रामबहादुरया तःधीकःम्ह काय्। ज्ञानबहादुर। वइगु बंगलाय् थौं जि। ज्ञानबहादुरया बंगला। खुइदँ न्ह्यःया रामबहादुरया खिउँगु डेरा। लुमनी ।

खिउँगु चा। अनसं सुथ जूगु जितः आभास जुइ ।

More Stories Like this