पेले याःसा नोट अफ डिसेन्ट
'नेवाः नापं जनजातिया मुद्दाय् बैद्य न्ह्यःने'
येँ (सन्ध्या टाइम्स) / एकीकृत माओवादीया न्ह्यानाच्वंगु केन्द्रीय कमिटीया बैठकय् अध्यक्ष प्रचण्ड व उपाध्यक्ष बाबुराम भट्टराई छथाय् च्वनाः तयार याःगु शान्ति व संविधानया नीतियात यदि बहुमतया आधारय् निर्णय याना वन धाःसा विद्रोहया लाइन ज्वनाच्वंम्ह उपाध्यक्ष मोहन बैद्यं नोट अफ डिसेन्ट च्वइगु जूगु दु ।
वैद्य पक्षधर छम्ह नेतां 'सन्ध्या टाइम्स' लिसे खँल्हासें बैठकय् न्हापा थें हे बहुमतया आधारय् पेले यानाः वन धाःसा वैद्यं नोट अफ डिसेन्ट च्वइगु निश्चित दु धयादीगु दु । न्हापा नं प्रचण्ड व वैद्य छथासं च्वनाः विद्रोहया लाइन पारित याःगु इलय् बहुमतया आधारय् न्ह्याः वंगु खःसा अबलय् उपाध्यक्ष भट्टराई नंनोट अफ डिसेन्ट च्वयादीगु खः । आः हाकनं शान्ति व संविधानया पक्षय् बहुमत दइगु अवस्थाय् विद्रोहया पक्षधरतय्सं नोट अफ डिसेन्ट च्वइगु अवस्था ब्वलंगु खः ।
थ्व हे दथुइ राज्य पुनर्संरचनाया सवालय् लिपांगु इलय् वयाः माओवादीया अध्यक्ष प्रचण्ड व उपाध्यक्ष बाबुराम भट्टराई लचक जुयाः कांग्रेसलिसे गोप्य रुपं वार्ता यानाच्वंगु खँ छम्ह नेतां धयादीगु दु । विशेष यानाः कांग्रेस नेता नरहरि आचार्यया प्रस्ताव कथं राजधानी प्रदेश नापं यानाः न्हय्गू
प्रदेश दयेकेगु सवालयात कयाः इमिसं कांग्रेस नेतातलिसे सहलह ब्याकाच्वंगु खँ वःगु दु । उखे मेम्ह उपाध्यक्ष वद्यं धाःसा संविधानसभाया राज्य पुनर्संरचना समितिपाखें तयार याःगु १४ प्रदेशयात आधार दयेकाः जक राज्य पुनर्संरचना यायेमाः धकाः पार्टी दुने अडान तयाच्वंगु सीदुगु दु । थुकथं आः पार्टी दुने प्रचण्ड सिबें नं वैद्य पक्षं जनजातिया लाइनयात प्रस्टं ज्वंगु खने दुगु दु ।
