संविधानया खाका गज्याःगु?
संविधानसभाया म्याद गुलि थपे यायेगु खँय् विवाद
येँ (सन्ध्या टाइम्स)/ थ्वहे वइगु जेठ १४ गते न्हूगु संविधान जारी याये फइगु सम्भावना पटक्क हे मखनेवं आः सत्तारुढ पार्टी एमाले व उकियात समर्थन यानाच्वंगु पार्टी एनेकपा माओवादीं हानं छक्वः संविधानसभाया म्याद थपे यायेगु तयारी शुरु याना हःगु खँ सीदुगु दु ।
संविधानसभाया म्याद अथें थपे यायेबलय् आः जनतां पत्याः याइगु अवस्था मदुगु कारणं थःपिंसं ज्या नं यानाच्वनागु दु धकाः क्यनेगु ल्याखं जकसां संविधानया खाका सार्वजनिक यायेगु खँ दलतय्सं न्ह्यःने हःगु दु ।
विज्ञ सूत्रं बिउगु जानकारी कथं संविधान दयेकेगु ज्याय् आः तकसहमति जुइधुंकूगु सम्पूण बुँदात छथाय् हे तयाः 'कम्पाइल' यासें उगु खाका तयार यायेत्यंगु खः । थगुने थें छुं हे ज्या न्ह्यःने मतसे संविधानसभाया म्याद थपे यायेगु जक धायेबलय् जनतां पत्याः मयाइगु जक मखु देय्या आदिवासी, जनजाति व मधेसी लगायतया समुदाय विरोधय् हे कुहां वयेफुगु कारणं छुं ज्या नं यानाच्वनागु दु धकाः क्यनेगु व बाँकी दुगु ज्या जक यायेत संविधानसभाया म्याद थपे यायेमाल धकाः इनाप यायेबलय् सकस्यां स्वीकृति बी धइगु तायेकाः थ्व खाका दयेकेत्यंगु खः ।
संविधानसभां संविधान दयेकेगु ज्याय् आः तक तकया दुने फुक्क धइथें विषयय् सहमति दयेकेधुंकूगु दु । आः मुख्य रुपं विवाद जुयाच्वंगु स्वंगू प्रमुख मुद्दाय् जक सहमित जुइ ल्यं दनि । तर आः म्याद थपे यायेगु फुक्कं तारतम्य मिले याःसां आःया पालय् संविधानसभाया म्याद गुलि थपे यायेगु धइगु खँय् धाःसा अझ नं विवाद जुयाच्वंगु दनि । यक्व ज्या ल्यं मदयेधुंकूगु कारणं न्हापा थें दछि हे म्याद थपे याये जी मखु धइगु खँय् यक्वसिया सहमति दुसां स्वलांनिसें-खुला तक म्याद थपे यायेमाली धइगु सुझाव अप्वः वयाच्वंगु खँ नं सूत्रं धाःगु दु । गुलि म्याद थपे याये माली धइगु खँ क्वःछीत दलतय् दथुइ हानं सहमति याइगु खँ दु ।
