नेवाः ताम्सालिङ बन्द ताःलाकेत यलय् सहलह मुँज्या

"वर्तमान राजनैतिक परिस्थिति व बैशाख १४ या नेपालबन्द" विषयस थौं यलय् सहलह ज्याझ्वः जुल । नेपालभाषा मंकाः खलः यलया ग्वसालय् जूगु उगु ज्याझ्वलय् बैशाख १४ गते यायेत्यंगु नेवाः ताम्सालिङ बन्दया औचित्य बारे नेपाल स्वायत्त राज्य मंकाः संघर्ष समितिया नायः राजभाई जकःमिं ध्वाथुइकादीगु खः । वय्कलं नेवाः ताम्सालिङ बन्दया लागि स्वनिगः जक मखु स्वनिगः पिने नं जागरण हयेत तीर्थराम डंगोल दीलिप महर्जन लगायत सभासदपिन्सं अभियानय् ब्वतिकयाच्वंगु खँ धयादिल ।

सरकार व राजनैतिक पार्टीतय्त दबाब बीगु नापं जनचेतना थनेगु वय्कःया धापू खः । नेपालमण्डल बन्द यायेगु झ्वलय् यलय् म्हितेमाःगु भूमिका बन्दया झ्वलय् जुइफूगु सम्भावित दुर्घटनापाखें जुइमाःगु सचेतना बन्द ताःलाकेगु लागि यायेगु थी थी ज्याझ्वःया विषयस सहलह जूगु खः । नेपालभाषा मंकाः खलः यलया नायः किरण शाक्यं न्ह्याकादीगु उगु सहलहस यलया बौद्धिक ब्यक्तित नापं नेवाः न्ह्यलुवातय्गु उपस्थिति दुगु खः ।

थ्वहे झ्वलय् नेवाः ताम्सालिङ बन्द यायेगु लागि कन्हय् यलय मंगलबजारं प्रचार रायलि जुइत्यंगु दु । न्हिनसिया निताः इलय् मंगलबजाःपाखें न्हयाइगु उगु ज्याझ्वः गाःहिति, च्यासः, चपट, पिंछेँ, त्यागः, लुँखुसि, ओकुबहाः, तंगः, लगंख्यः, कुमारीपाटी, जाह्वलाख्यः, पुच्वः, छाय्बहाः, नकबही, पट्को जुयाः मंगलबजारय् क्वचायेकीगु खँ धाःगु दु ।

इलय् संविधान पितबीगु, संघीय लोकतान्त्रिक गणतन्त्रयात संस्थागत याकॆगु, अखण्डित नेवाः व अखण्डित ताम्सालिङ स्वायत्त राज्य सुनिश्चित यायॆगु, म्हसीका व सामथ्र्यया लिधंसाय् संघीय राज्य दयेकेगु, संघीयता व गणतन्त्र विरुद्ध षडयन्त्रयात खवरदारी यायेगु लागि नेवाः स्वायत्त राज्य मंकाः संघर्ष समिति व ताम्सालिङ संयुक्त संघर्ष समितिया मंकाः इनापय् बैशाख १४ गते नेवाः ताम्सालिङ बन्द यायेत्यंगु खः ।

More Stories Like this