छगू अपराध [बाखं]

सुशील राजोपाध्याय

अड्डं लिहाँवया च्वना । लँय् जुइ नं थाकुया च्वन थौंकन्हय् । हूल नं गुलि जक धयागु नि । थःगु मतापं जुयाच्वंपिन्त ला घ्वात्तु हे घ्वाना थकीगु । जि नं घ्वात्तु घ्वाकाःतुं न्हूसतकं बसन्तपूपाखे ववं नाइट मार्केट धकाः बँपसः तयेकातःथाय् थ्यन । अन झन हूल जुयाच्वन । हूल मजुइगु नं गनं । अन हे बँपसः, अन हे मनूत जुइगु, अनं हे गाडी, मोटरसाइकल ब्बाइगु । उकिसं मोटरसाइकल गइपिं ला झन छु धाये ...... छकूचा हृवः दतकि अन हे स्वचाःवनीगु उलि जक गन खः धकाः लँया थःगु लागां मेपिनिगु लागा क्वत्यलाः मेपिनिगु लँ पनाबीगु । अले मदिक्क हरन न्यायेकाः लँ चिलाहुँ धया थें लाखेमिखा कनाः स्वयाच्वनिगु । जमाना हे अजाःपिं लाखेतय्गु जुइधुंकल ।

कुमारी छेँ क्वय् थ्यन । जिगु मिखा न्ह्यःने चय्दँति दुम्ह छम्ह मिसा लाःवल । पालापाला थ्याक्क पाँय्पाँय् थाःगु वसः न्ह्यतुगु सँ । छ्यंगू कय्कुने धुंकूगु ख्वाः । गुजिगुजि काःगु छ्यंगूया भुलिइ खिति क्वसिनाः यचु मजूगु ल्हाः । माःबूगु,लाकां मदुगु तुति । तलबः ततज्याःगु पालि । चाःतुले धुंकगु जँ । बःबः फिनातःगु लं । द्यंगाःचिंक चिनातःगु जनी । जनिखय् छु छु स्वचाकातःगु दु । प्वः प्वः कुबियातःगु दु, मेमेगु नं । थ्व फुक्क खंबलय् थ्व मिसाया छेँ मदुजुइ, थःथितिपिं सुं मदुजुइ । उकिं थथे सतकय् च्वनाः प्वाः थनाच्वन जुइ धयागु मतिइ वल । वयागु उमेरया ल्याखं जिं वयात अजि धायेल्वइ । अथे अजि थें च्वंम्ह । छेँ सतकय् - क्वाक्क निप्यय् नयाः थः मनूतय्गु सुसाःकुसाःलय् च्वनेमाःगु इलय् थःत थःम्हं लहीमाःगु, गजाःगु हाथ्या - थ्व फुक्क बिचाः यानाच्वनाम्ह जिगु नुगः मछिन । थःम्हं मेगु छुं यायेमफुसां धकाः दां सच्छि वयागु ल्हाःतय् तयाः जि थःगु लँ लिना वनाछ्वया । जिं उकुन्हु छगू तःधंगु पुण्यया ज्या यानागु तायेकाच्वना । द्यनाबलय् नं याउँक वल ।

कन्हय् सुथय् जि मर्निङ्कवाक वना । लिहाँवयाः योगा भचा याना । म्ह याउँसे च्वन । अखबार स्वया । तिरिं सःतेव जा नःवना ।

अड्ड वनेत पिहाँवया । ई ब्बानाच्वन । जिगु पलाः च्वन । वँवं जिगु मनय् म्हिगःयाम्ह अजि लुयावल । कुमारी छेँ क्वय् व अजि स्वयेदइ धयागु मतिइ वल । कुमारी छेँ क्वय् थ्यन । जिगु मिखां अजियात माल । अजि खनेमदु । अले जि तप्यंक न्हूसतकपाखे वनाछ्वया ।

वँवं बसन्तपू दबू कुनय् फ्वःछेँ वनेपाखे पुचः मनूत मुनाच्वंथाय् मिखावन । व मनू पुचः छाय् मुंगु जुइ,मनय् न्ह्यसः दनावल । स्वस्वं सिल,अन ला च्यापसः खनी । च्या त्वनाच्वंपिनिगु पुचः खनी व । सितिकं त्वंकाच्वंगु थें,गुलिजक हूल यानाच्वंगु जुइ मनूत नं थथे मतिइ ततं वनाच्वनाम्ह,जिं खन म्हिगःयाम्ह अजि अन । खनेवं जि झसंग जुल । झसंग वंगुया हुनि व अजिया छ्यनय् हिनातःगु तुयुगु बालाचागु कापःया बेतालि । अजाःगु बेतालि छ्यनय् घाःपाः जुलकि वासः पायेधुंकाः चिकीगु खः । जिं बिचाः याना, घाःपाः हे जूगु जुइमाः व अजिया । ज्यिथिम्ह अजि । दलदिल जकं ला - तर जिके ई मदु । अड्डय् म्हिगः थें छेर्की जाँच वइगु लुमन । अय्सां अजियात छु जूगु, गय् जूगु सीकेगु तसकं आत्तुर जुल । तर ल्यूनें अड्डया छम्ह पासां "का म्वाःल झीत लिबाय् धुंकल नु" धकाः साला यंकल । जि जलमिं साला यंकूम्ह । उकिं नुगः मुक्कं बसन्तपुलिइ तयाः न्ह्याःवना ।

अड्ड थ्यन । छतिं ज्या याये मं मदु । ईमेल छकः चेक याये धकाः कम्प्युटरय् च्वना । मजिमगाःगु छुं मदु खनी ।
फेशबुक छकः चायेकाः स्वया । किपात अपलोड यानातःगु जुयाच्वन, पासा शान्तराजं । किपात स्वस्वं वना । छपाः किपा खनेवं नुगः भाराक्क मिन । जिगु भ्रम जकं खःला धकाः क्वथीक स्वया । खः,किपा व हे घाःपाः जुइकाच्वंम्ह अजियागु हे । किपा क्वसं छुं च्वयातल । अले ब्बने हथाय् जुल जितः । ब्वने धुनेवं अजिं घाःपाःनःगु जिं यानाः खनी धयागु सिल । जिं थःत थःम्हंतुं छम्ह अपराधी भाःपिया । जिं अजियात दां मखु,नसात्वँसा बीमाःगु खनी । पासा शान्तराजं च्वयातल, "म्हिगः बहनी दां लाकेगु झ्वलय् खाते मस्तय्सं दायाः घाःपाः जूम्ह ज्यिथिम्ह फ्वगिं मिसा ।"

साभार : बाखं दबू ल्याः ४।

More Stories Like this