श्वेतपत्र विरुद्ध स्थगन प्रस्ताव

आः संसदय् श्वेतपत्र बाहेक मेगु सहलह याये मजिल

येँ (सन्ध्या टाइम्स)/झलनाथ खनालया सरकारं व्यवस्थापिका संसद चले जुयाच्वंगु हे इलय् पिने पत्रकार सम्मेलन यानाः हःगु श्वेतपत्रयात कयाः प्रमुख प्रतिपक्षी दल नेपाली कांग्रेस व राष्ट्रिय प्रजातन्त्र पार्टी जानाः थौं व्यवस्थापिका संसदय् स्थगन प्रस्ताव दर्ता याःगु दु ।

श्वेतपत्रया बारे छलफल हे मयासे व्यवस्थापिका संसदया कारवाही न्ह्याके दइ मखु धकाः थौं सुथय् कांग्रेसं स्थगन प्रस्ताव दर्ता याःगु खः। अन्तरिम संविधान जारी जुइधुंकाः न्हापांखुसी अथे संसदय् स्थगन प्रस्ताव दर्ता जूगु खः। नेपाःया संसदीय इतिहासय् तसकं म्हो जक जुइगु स्थगन प्रस्ताव थौं दर्ता यानाः वयेधुन धकाः कांग्रेसया नेता डा. रामशरण महतं संचारकर्मीतय्त थुकिया जानकारी बियादीगु खः। वय्कः पुलांम्ह अर्थमन्त्री नं खः। उज्वःगु कथंया स्थगन प्रस्ताव न्हापा प्रतिनिधिसभाय् एमालेपाखें छकः याये धुंकूगु दु। उज्वःगु प्रस्ताव सुथय् दर्ता यात धाःसा उकुन्हु हे व्यवस्थापिका संसदया बैठकय् मतदान यानाः उकियात कयाः टुंगो लगे यायेमाःगु प्रावधान दु ।

संसदया कार्य संचालन नियमावलीया नियम ३३ कथं उगु प्रस्ताव दर्ता जूगुलिं थौं संसदय् मेमेगु विषय सहलह हे याये मदइगु जूगु दु। थौं कांग्रेसया उगु प्रस्तावयात कयाः सहलह लिपा अर्थमन्त्री भरतमोहन अधिकारीं जवाफ बियादी। अले जक प्रस्तावयात कयाः मतदान जुइगु प्रावधान दु। उगु प्रस्तावयात कयाः नेपाली कांग्रेसया प्रमुख सचेतक लक्ष्मणप्रसाद घिमिरें संचारकार्मीतलिसे खँल्हासें धयादिल, 'जिपिं श्वेतपत्रबारे गम्भीर रुपं प्रस्तुत जुइगु जुइ। सरकारं संसद चले जुयाच्वंगु हे इलय् पिने पत्रकार सम्मेलन यानाः हःगु श्वेतपत्रयात कयाः थौं गम्भीर रुपं संसदय् उपस्थिति क्यनेगु जुइ।' कांग्रेस व राप्रपा जानाः दर्ता याःगु उगु प्रस्तावया प्रस्तावक नेपाली कांग्रेसया डा. रामशरण महत खःसा समर्थकय् राष्ट्रिय प्रजातन्त्र पार्टीया नेता डा. प्रकाशचन्द लोहनी जुयादीगु दु ।

उगु स्थगन प्रस्तावय् संसदीय छलफल अथवा राष्ट्रिय सहमतिया आधारय् जक आर्थिक एजेण्डा तयार यायेमाः धकाः माग यानातःगु दु। संसदय् प्रमुख प्रतिपक्षं हइगु अविश्वासया प्रस्ताव लिपाया दकलय् महत्वपूर्णगु प्रस्ताव धइगु हे स्थगन प्रस्ताव खः ।

न्हूगु लाइनयात कयाः थौं माओवादी बैठक
माओवादी अध्यक्षं विद्रोहया लाइन त्वःताः शान्ति व संविधानयात प्राथमिकता बियाः वनेमाः हःगु न्हूगु लाइनयात कयाः थौं माओवादी केन्द्रीय कमिटीया बैठक च्वनीगु जूगु दु। अध्यक्ष प्रचण्डया उगु लाइनयात कयाः उपाध्यक्ष मोहन वैद्यं फरक मत तइगु ग्वसाः दु ।