मधेशी मागं एमाले दिक्क

थौं प्रतिवद्धता वःसा थौं हे समर्थन

येँ सन्ध्या टाइम्स÷सरकार गठन यायेगु धकाः सुरे जुयाच्वंम्ह एमालेयात मधेशी मोर्चां न्ह्यःने तये हःगु प्रस्तावं मिछंगु अवस्थाय् लाका बिउगु दु । मधेशी मोर्चापाखें २०६४ फागुन १६ गते सरकारलिसे याःगु ८ बुँदे सम्झौता पालना याये धइगु लिखित प्रतिवद्धता माः धकाः प्रस्ताव छ्वयेवं एमालेयात मिछंगु खः ।

स्वायत्त मधेश प्रदेश बीगु खँ उल्लेख जुयाच्वंगु उगु सम्झौतायात अबलय् एमालें कडा शव्दं विरोध याःगु खः । लिसें बुटवलय् जूगु एमालेया महाधिवेशनं उगु सम्झौता लागू याके दइ मखु धकाः प्रस्ताव समेत पारित याःगु खः । आः वहे सम्झौता थम्हं हे पालना याये धकाः लिखित प्रतिवद्धता प्वंकेत एमालेयात थाकुयाच्वंगु खँ धाःगु दु ।

मधेशी मोर्चापाखें उगु सम्झौता पालना याये धइगु लिखित प्रतिवद्धता माः धकाः माग यायेवं एमालें ुउगु सम्झौतायात संविधानसभाय् प्रवेश याकाः छलफल याकेत थःिपं तयार दु धकाः च्वयाः छ्वया बिउगु खः । तर एमालें छ्वयाहःगु थ्व लिखित लिसःयात मोर्चां अस्वीकार याःगु दुसा उकियात संशोधन यानाः हानं एमालेयात तुं लित बिउगु दु । थौं एमालें थुकिया बारे सहलह यानाः लिसः बी धाःगु दु । उखे मोर्चां नं यदि एमालें थौं थ्व प्रतिवद्धता प्वंकल धाःसा थौं वयात समर्थन यायेगु जुइ धकाः लिसः बियाछ्वःगु दु । सूत्रया कथं थःिपंसं महाधिवेशनपाखें हे कडा रुपं विरोध यानागु सम्झौतायात आः थम्हं हे पालना याये धकाः लिखित प्रतिवद्धता प्वंकेगु पाय्छि मजुइगु बिचाः पार्टी दुने ब्वलना वयाच्वंगु दु ।

उखे मोर्चापाखें आधिकारिक रुपं थज्याःगु प्रस्तावया खँ जुयाच्वंसां उकी दुने च्वंगु निगू घटक तमलोपा व सद्भावना पार्टीं धाःसा एमालेयात समर्थन यायेगु धकाः घोषणा यायेधुंकूगु दु । मेगु घटक मधेशी जनअधिकार फोरमं धाःसा अझ नं माओवादीलिसे वार्ता न्ह्याकाच्वंगु दनि । थौं सुथय् नं फोरमया नेतात व माओवादी दथुइ वालुवाटारय् सहलह जूगु खँ सी दुगु दु । उगु बैठकय् फोरमया नेतातय्सं संसद अवरुद्ध यायेगु ज्या दिकाः सदन सुचारु यायेगुपाखे कुतः जुइमाल धकाः इनाप याःगु खँ सीदुगु दु । सूत्रया कथं यदि माओवादीं थःपिनि नेतृत्वय् सरकार दयेके फइगु सम्भावना मंत धाःसा

फोरमया अध्यक्ष उपेन्द्र यादवयात हे प्रधानमन्त्री दयेकेत नं थःिपं तयार दु धइगु संकेत बिउगु दु ।

थ्वहे झ्वलय् उखे थारु आन्दोलनकारीतय्सं मधेशी मोर्चां न्ह्यःने उगु सम्झौतायात संसदं पिने पूरा यायेगु खँ जुल धाःसा उकिया विरुद्ध हानं आन्दोलन यायेगु ख्याच्वः बिउगु दु ।