अध्यक्ष प्रचण्डं काःगु 'यु टर्न'

सत्ता साझेदार राजनीतिक पार्टी एनेकपा (माओवादी) या अध्यक्ष प्रचण्डं पार्टी दुने न्हापा थम्हं हे पारित यानातःगु विद्रोहया राजनीतिक लाइनयात त्वःताः आः शान्ति व संविधान निर्माणया लाइन ज्वनेगु प्रस्ताव न्ह्यःने तयादीगु दु। अध्यक्ष प्रचण्डपाखें न्हापा थःपिंसं ज्वना वयागु बिचाःयात त्वःताः न्हूगु बिचाः ज्वंगु कारणं माओवादी दुने हानं न्हूगु कथंया तरंग पिहां वःगु दुसा उगु तरंगं सम्पूर्ण नेपाःया हे राजनीतियात चलायमान याना बिउगु दु। अध्यक्ष प्रचण्डं पालुङटारय् जूगु पार्टीया विस्तारित बैठकय् थःपिं हानं छक्वः विद्रोहया हे लाइनय् वनेमाः धइगु राजनीतिक लाइन पारित यानादीगु खः। उकी वय्कःयात पार्टीया वरिष्ठ उपाध्यक्ष मोहन वैद्य किरणं साथ बियादीगु खः। वय्कःपिं निम्हेसिया उगु लाइनयात मेम्ह उपाध्यक्ष डा. बाबुराम भट्टराईनं विरोध यासें थ्व इलय् विद्रोहलय् वनेगु मयासे शान्ति व संविधान निर्माण यानाः चुनावय् वनेमाः धइगु लाइन ज्वनादीगु खः। अज्याःगु लाइन ज्वन धकाः पार्टी दुने डा. भट्टराईया व्यापक आलोचना जूगु खःसा वय्कःया विषयय् अनेक कथंया शंका समेत याना हःगु खः। आः अध्यक्ष प्रचण्डं हानं छक्वः वय्कःया हे लाइन ज्वंगु कारणं थुकिं डा. भट्टराईयात अवश्य नं लय्तायेका बिउगु दयेमाः ।

वास्तवय् थौंया इलय् हानं विद्रोहलय् वनाः सफल जुइगु सम्भावना मदु। राष्ट्रिय अन्तर्राष्ट्रिय छुं हे रुपं थ्व अवस्था मदु। माओवादीं थगुने याःगु कुतः नं विफल जुल। उकिं आःया ई शान्ति कायम यानाः प्रगतिशील संविधान मार्फत देय् न्ह्याकेगु हे खः। झिदँया विद्रोहपाखें चूलाःगु उपलब्धीयात संरक्षण यायेत थ्व लाइन पाय्छि जुइ ।

More Stories Like this